Коронавирусга қарши курашиш штаби аъзоси, профессор Ҳабибулло Оқилов эмизикли оналар коронавирусга чалинган бўлса, фарзандини қандай эмизиши борасида аниқлик киритиб ўтди.
«Жаҳон соғлиқни сақлаш ташкилотининг тавсияларига кўра, эмизикли аёл коронавирус касаллигига чалинган бўлса, барча гигиеник қоидаларига риоя этган ҳолда боласини эмизиши мумкин. Бунинг учун аёл қўлларини яхшилаб совунлаб ювиб, уларга дезинфекция воситалари билан ишлов бериб, юзига тиббий ниқоб тақиб имкон доирасида бола томонга эмас, балки қарама-қарши томонга қараб нафас олиши лозим», — дейди мутахассис.
Эслатиб ўтамиз, аввалроқ Ҳабибулла Оқилов ҳозирги кунда ҳомиладор аёллар коронавирус инфекциясига ва унинг асоратларига бошқалардан кўра кўпроқ мойиллиги тўғрисида ахборотлар йўқлиги, лекин шу билан биргаликда соғлом фарзанд кўриш мақсадида инфекция туридан қатъи назар ҳомиладор аёл улардан ўзини асраши кераклиги барча тоифадаги шифокорлар томонидан таъкидланишини айтган эди. Шунингдек, Соғлиқни сақлаш вазирлиги ҳузуридаги Коронавирусга қарши кураш штаби аъзоси Анвар Алимов коронавирус хотин-қизларда бепуштликка олиб келиши эҳтимоли борлигини айтганди. Россия соғлиқни сақлаш вазири Михаил Мурашко эса коронавирус инфекцияси бепуштликка олиб келиши мумкинлиги ҳақида ишончли далиллар йўқлигини билдирган.
Изоҳ (0)