Вьетнамдаги Дананг курорт шаҳрида коронавирус эпидемияси бошлангани туфайли 80 минг нафар сайёҳ эвакуация қилинмоқда. Бу ҳақда Вьетнам ҳукуматининг баёнотида маълум қилинган.
Эвакуацияга камида тўрт кун вақт талаб қилинади. Асосий қисми вьетнамлик бўлган туристлар маҳаллий авиакомпаниянинг самолётларида хавфсиз ерга кўчирилади. Данангдан мамлакатнинг бошқа шаҳарларига кунига тахминан 100 та рейс амалга оширилиши режалаштирилган.
25 июлда Данангда яшовчи 57 ёшли эркакда COVID-19 инфекцияси борлиги тасдиқланган. У бир ой давомида мамлакат ҳудудидан ташқарига чиқмаган. Тахминларга кўра, эркак шаҳардаги касалхоналардан бирида коронавирус инфекциясига чалинган. 26 июлда шаҳарда коронавирус юқтириб олиш бўйича яна иккита янги ҳолат қайд этилган, 27 июлда 11 та ҳолат кузатилди. Ҳукумат Данангда коронавируснинг янги ўта юқумли штамми тарқалганини маълум қилган.
28 июлда Дананг шаҳрининг асосий қисмида карантин тартиби жорий қилинганди. Шаҳар аҳолисининг уйлардан чиқишга фақат дори ёки озиқ-овқат маҳсулотлари сотиб олиш, ишга бориш ёки фавқулодда вазиятларда рухсат этилган. Одамларга кўчада тўпланиш тақиқланган ва 2 метрлик оралиқ масофани сақлаш қоидасини бузмаслик тавсия қилинган.
Вьетнам Жануби-Шарқий Осиёда коронавирусга қарши курашда катта муваффақиятга эришган мамлакатлардан бири ҳисобланади. Мамлакатда 431 та касалланиш ҳолати қайд этилган, 365 киши касалликдан тузалган ва ҳеч ким касалликдан вафот этмаган.
Вьетнамдаги 276 та ҳолатда коронавирус билан касалланганлар хориждан кириб келган. 99 кундан буён мамлакатда бирорта ҳам касалланиш ҳолати қайд этилмаганди.
Баҳорда Вьетнам ҳукумати касалланганлар билан мулоқотда бўлганларни тезкорлик билан кузатишни ташкил қилиш орқали COVID-19’нинг кенг ёйилиб кетишига йўл қўймаган. Шунингдек, мамлакатда шаҳар-у қишлоқларда қатъий карантин тартиби жорий қилинган ва чегаралар ёпилганди.
Изоҳ (0)