Дунёда янги коронавирус келтириб чиқарган пандемия кучаймоқда. Сўнгги олти ҳафта ичида касалликлар сони деярли икки бараварга ошди ва 16 миллионга яқинлашди, вафот этганлар сони 640 мингдан ошди. Бу ҳақда 27 июль куни Женевада бўлиб ўтган брифингда Жаҳон соғлиқни сақлаш ташкилоти бош директори Тедрос Гебрейесус маълум қилди, деб ёзмоқда «ТАСС».
«ЖССТга 16 миллионга яқин касаллик ва 640 мингдан ортиқ ўлим ҳақида хабар келиб тушган. Пандемия тезлашишда давом этмоқда», — деди ЖССТ раҳбари. Ташкилот бош директорининг таъкидлашича, сўнгги олти ҳафта ичида бундай ҳолатлар деярли икки баравар ошди.
Мавзуга доир: Бутун дунё бўйлаб бир суткада 284 мингдан ортиқ киши коронавирусга чалинди. Кунлик антирекорд янгиланди
ЖССТ раҳбарининг сўзларига кўра, COVID-19 пандемияси «дунёни ўзгартирди». У бир вақтнинг ўзида одамлар ва жамиятларни бирлаштирди ва уларни ажратиб қўйди, бу «одамлар ижобий ва салбий муносабат билдиришга қодир» эканлигини кўрсатди. «Биз кўп нарсаларни ўргандик ва ҳали ҳам кўп нарсани ўрганяпмиз», — деди Тедрос Гебрейесус. Унинг эслатишича, «дунё ўзгарган бўлса-да», коронавирусга қарши кураш «сиёсий раҳбарлик, шунингдек, жамоатчиликнинг хабардорлиги ва (пандемияга қарши курашда иштирок этиш) уларни тинглаш қобилияти» каби муҳим омилларни талаб қилади.
Инфекция тарқалишига қарши кураш чоралари
ЖССТ раҳбари ҳозирги пандемия ЖССТ томонидан эълон қилинган энг жиддий глобал фавқулодда вазият эканлигини таъкидлади. У кўрилган чора-тадбирлар туфайли Австралия, Вьетнам, Германия, Камбоджа, Канада ва Хитойни касаллик авж олишининг олдини олишга ёки уни назоратга остига олишга муваффақ бўлган давлатлар қаторига қўшди.
Унинг таъкидлашича, инфекциянинг тарқалишига қарши курашнинг асосий чора-тадбирлари инфекцияни аниқлаш, касалларни ва улар билан алоқада бўлганларни изоляция қилиш, тест ўтказиш ва даволашдир. «Масофани узоқроқ тутинг, қўлларингизни ювинг, гавжум жойлардан ва ёпиқ хоналардан сақланинг, тавсия этилган жойларда ниқоб тақинг», — деб қўшимча қилди ЖССТ бош директори.
Бундан ташқари, Тедрос Гебрейесуснинг таъкидлашича, ташкилот ташаббуси билан Коронавирусга қарши курашиш бўйича бирдамлик жамғармасига 225 миллион доллардан кўпроқ маблағ келиб тушган ва ушбу маблағлар 536 минг индивидуал донор ва компания томонидан юборилган.
Изоҳ (0)