26 июль куни Хитойдан Ўзбекистонга яна 1000 та кислород концентратори олиб келинди. Бу ҳақда «Ўзбекистон 24» телеканалида маълум қилинди.
Олиб келинган юклар Тошкент халқаро аэропорти ҳудудида Мудофаа, Ички ишлар вазирликлар ва бошқа мутасадди ташкилотлар вакиллари томонидан қабул қилиб олинган. Ушбу юкнинг умумий қиймати 20 миллион долларни, оғирлиги 2,5 тоннани ташкил этади.
Махсус юклар таркибида шахсий ҳимоя воситалари мавжуд. Шунингдек, коронавирус инфекцияси билан касалланган беморларни даволашда қўлланиладиган тиббий буюмлар олиб келинган. Бундан ташқари, 1000 дона ўпка яллиғланганда фойдаланиладиган кислород концентраторлари ҳам мавжуд.
«Хитойдан келтирилган тиббий буюмлар республика ҳудуди бўйлаб карантин режимини таъминлашга жалб қилинган ҳарбий хизматчилар, ички ишлар, тиббий ходимлар ва бошқа муҳтож шахслар ҳамда бугунги кунда фаолият юритаётган ва қурилаётган шифохоналарга тарқатилади», — дейилади хабарда.
Аввалроқ Хитойдан 1300 та кислород концентратори, 20 та ПЗР синов аппарати ҳамда вирусга қарши дори воситалари олиб келингани тўғрисида хабар берилганди.
Мавзуга доир:
- Бухоро вилоятида донаси 12 млн сўмдан жами 50 та кислород концентратори харид қилинган. Аппаратнинг асл нархи қанча?
- Бухоро ҳокимлиги кислород концентраторлари Медтехно траде хусусий корхонасидан харид қилинганини маълум қилди
- Ўзбекистонга Сингапурдан 30 та кислород концентратори беғараз ёрдам сифатида олиб келинди
Изоҳ (0)