Ўзбекистон энерготизимида ишлаб чиқарилаётган ва истеъмол этилаётган электр энергияси орасида номутаносиблик вужудга келаётгани сабаб 21 июль кунидан бошлаб республика истеъмолчиларига чекловлар киритилаётгани тўғрисида хабар берилганди. «Ўзбекистон миллий электр тармоқлари» АЖ матбуот хизматининг маълум қилишича, мамлакатда дам олиш кунлари электр таъминотига чекловлар киритилмаган ҳамда Туркманистондан электр энергияси импорт ҳажми оширилган.
Ўзбекистон гидроэлектр станцияларида ишлаб чиқариш ҳажми сув ресурслари танқислиги туфайли сезиларли даражада камайгани, бундан ташқари, Тожикистондан қабул қилинаётган импорт амалиётининг кескин камайиши (Тожикистон гидроэлектр станциялари сув омборларидаги сув сатҳини камайиши оқибатида) сабабли электр таъминоти тизимига 0,8—1,0 фоиз миқдорида чекловлар киритилаётган эди.
Маълум қилинишича, 27 июль куни соат 01:35 вақти билан Туркманистондан электр энергияси импорт ҳажми оширилган. Ҳозирча 500 кВли Қоракўл–Сердар ҳаво тармоқлари орқали Ўзбекистонга 80 МВт қувват етказиб берилмоқда. Кун давомида етказиб бериладиган қувват ҳажми 200 МВтгача етказилиши режалаштирилган.
«Ўтган ҳафтанинг шанба ва якшанба кунлари энергетика тизимида истеъмолни чеклаш ҳолатлари кузатилмади. Туркманистондан электр энергияси импортининг бошланиши мамлакатимизда ишлаб чиқарилаётган асосий электр энергиясига қўшимча равишда янги ҳафтанинг иш кунларида ҳам (одатда дам олиш кунларига нисбатан истеъмол даражаси кескин ошиши кузатилади) истеъмолчиларни электр энергияси билан узлуксиз таъминлаш имконини беради», — дейилади хабарда.
Маълумот учун, «Ўзбекистон миллий электр тармоқлари» акциядорлик жамияти 2019 йилнинг 1 декабридан «Туркманэнерго» давлат электр энергетика корпорациясидан электр энергияси импорти амалиётини амалга ошириб келмоқда.
Изоҳ (0)