Бухорода коронавирусга чалинган 57 ёшли эркак вафот этди

Бухоро вилоятида коронавирусга чалинган 57 ёшли эркак вафот этди, дея хабар бермоқда Соғлиқни сақлаш вазирлиги.

Бухоро шаҳрида яшаган 57 ёшли З.Э. исмли эркакда 3 июль куни коронавирус инфекцияси тасдиқланган (шу куни, ССВ маълумотларига кўра, Бухоро вилоятида тўққиз кишида COVID-19 аниқланган) ва у Бухоро вилояти юқумли касалликлар шифохонасига ётқизилган.

Қайд этишларича, беморга COVID-19 инфекцияси ўта оғир кечиши, икки томонлама пневмония ташхиси қўйилган, касаллик ўткир нафас етишмовчилиги, ўпка артериялари тромбоэмболияси асорати билан кечган. Шунингдек, у паркинсонизм касаллиги билан ҳам оғриган.

«Бироқ реанимацион муолажаларга қарамай, беморнинг аҳволи кескин оғирлашиб, ўткир респиратор дистресс синдроми ва ўткир нафас етишмовчилигидан вафот этган», — дейилади ССВ ахборотида, бироқ бемор айнан қайси санада вафот этганига аниқлик киритилмаган.

Ҳозиргача Соғлиқни сақлаш вазирлиги 112 кишининг коронавирус асоратларидан вафот этганини хабар берди. «Дарё» ҳисоби бўйича коронавирус чалингач вафот этганлар сони 118 нафарни ташкил этмоқда.

Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган.

Шунингдек, 22 июлда Бош прокурорнинг собиқ ўринбосари, ҳозирда Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани хабар қилинган.

Бироқ ушбу олти ҳолат юзасидан ССВ томонидан айни вақтгача ахборот берилмаган.