Тошкентда янги кўприк қурилиши бошланади, деб хабар бермоқда шаҳар ҳокимлиги.
Шу муносабат билан Яккасарой тумани Усмон Носир 2-тор кўчасининг 200 метрлик қисми 6 ой муддатга ёпилиши маълум қилинди.
Ҳайдовчиларга вақтинча айланма йўллардан фойдаланиш тавсия қилинган ва келтирилган ноқулайликлар учун узр сўралган.
Аввалроқ Тошкент шаҳрида 6 та янги кўприк қурилиши таъкидланган эди. Улардан бири шаҳар маркази билан Сергели туманини боғловчи кўприк бўлиши ҳақида Президент Шавкат Мирзиёевнинг туманга ташрифи давомида қайд этилган.
Кўприкнинг узунлиги 583 метр ва у Чўпонота кўчаси ҳамда Кичик ҳалқа йўли кесишмасида барпо этилади. Бу чорраҳадан Тошкент ҳалқа автомобиль йўлигача янги кўча қурилиб, ҳалқа йўли остидан туннел орқали ўтказилади ва Қипчоқ кўчасида қурилаётган янги кўприкка туташади. Жами 5,6 километрлик бу йўл соатига 3 мингта транспорт воситасини ўтказиш қувватига эга бўлади.
Янги йўл ва кўприклар қурилиши натижасида Сергели туманига транспорт қатнови тирбандлиги 50 фоизга, транспорт ҳаракати вақти 20-25 дақиқага камаяди. Лойиҳанинг умумий қиймати 280 миллиард сўмдан зиёд экани маълум қилинган. Лойиҳа Тошкент шаҳар ҳокимлиги билан Туркиянинг «Калойн» компанияси ҳамкорлигида ишлаб чиқилган.
Изоҳ (0)