25 июль куни Қорақалпоғистон Республикаси Жўқорғи Кенгесига 2002 йилдан буён раислик қилиб келаётган Муса Тажетдинович Ерниязовнинг ўлими тўғрисидаги хабарлар тарқалди. Соғлиқни сақлаш вазирлиги матбуот котиби бу хабарларни рад этди.
«Бу хабар ҳақиқатга мутлақо зид. Муса Тажетдинович ҳаёт ва айни пайтда даволанмоқда. Етакчи мутахассислар у кишининг соғлиғи тикланиши учун курашяпти, узлуксиз консилиумлар ўтказиляпти. Асоссиз хабар тарқатишнинг жавобгарлиги борлигини унутмаслик лозим», — дейди ССВ матбуот котиби Фурқат Санаев.
Эслатиб ўтамиз, Муса Ерниязов коронавирусга чалингани 18 июль куни маълум бўлганди. Унинг аҳволини хорижлик мутахассислар билан бирга видеоконференция орқали муҳокама қилиш учун Соғлиқни сақлаш вазири Алишер Шодмонов Нукусга етиб борган. Ўшанда Муса Ерниязовнинг ҳолати барқарор, деб айтилган эди.
Муса Ерниязовнинг коронавирусга чалингани ҳақидаги хабарлар июль ойининг бошида пайдо бўлган. Аммо узоқ вақт яширилган.
ССВ 18 июль куни Жўқорғи Кенгес раиси Муса Ерниязов билан бирга Сурхондарё вилояти ҳокими Тўра Боболовнинг ҳам коронавирусга чалингани ва Тошкентда даволанаётгани ҳақида маълумот берганди. Боболовнинг ҳам коронавирус инфекциясини юқтириб олгани яшириб келинган.
Куни кеча Сурхондарё вилояти ҳокимининг вафот этгани ҳақида хабарлар тарқалганди. Бу ҳақдаги хабарлар тезда рад этилди, Боболовнинг ўзи шифохонадан видеомурожаат қилди ва аҳволи яхши эканлигини билдирди. Унинг ўлими ҳақида хабар тарқатганлар жазога тортилди.
Изоҳ (0)