Қашқадарё вилоятида катта миқдорда яроқсиз картошка уруғлигини фермерларга сотган шахслар қўлга олинди. Бу ҳақда Бош прокуратура “Дарё”га маълум қилди.
Қайд этилишича, Қашқадарё вилоятининг Китоб, Шаҳрисабз ва Яккабоғ туманларида картошка экилиши белгиланиб, Шаҳрисабз ва Яккабоғ туманларидаги 656 нафар фермер хўжаликларига «Egoist AST» МЧЖ томонидан 44,8 миллиард сўмлик 6400 тонна картошка уруғлигини етказиб бериш бўйича шартномалар имзоланган ва 23,6 миллиард сўм пул фирма ҳисоб рақамига ўтказилган.
Аниқланишича, «Egoist AST» МЧЖ томонидан Россиядан олиб келинган 498 тонна картошка уруғлигидан 394 тоннаси яроқсиз деб топилган, 104 тоннасига мувофиқлик сертификати берилган ва 60 тонна «Удача» навли картошка уруғлигини Ўзбекистон ҳудудида экиш белгиланмаган.
Шу билан бирга, маҳаллий «Samgold» МЧЖдан харид қилинган 500 тонна картошка уруғлигининг сифат сертификатлари мавжуд эмаслиги, ушбу пул маблағларидан 600 миллион сўми транспорт хизматини кўрсатиш лицензиясига эга бўлмаган «Hamroh asil yuksalish» МЧЖ ҳисоб рақамига ўтказиб берилиб, пул маблағлари ўзлаштириб юборилгани аниқланган.
Мазкур ҳолат юзасидан Бош прокуратура томонидан 2020 йил 6 июлда «Egoist AST» МЧЖ раҳбари А. Сафаровга нисбатан Жиноят кодексининг 167-моддаси 3-қисми (Жуда кўп миқдорда ўзлаштириш ёки растрата йўли билан талон-торож қилиш) билан жиноят иши қўзғатилиб, ҳозирда тергов ҳаракатлари ўтказилмоқда.
Изоҳ (0)