1911 йил 24 июлида Мачу-Пикчуга келиб, уни очган америкалик тадқиқотчи Хайрам Бингем уни «Перунинг уникал ёдгорлиги» деб атади. Шу тариқа бу шаҳар дунё бўйлаб машҳурликка эришди. «Дарё» буюк археологик кашфиётнинг юбилейи муносабати билан сайёҳларни ўзига жалб қилиб келаётган қадимги шаҳар ҳақида маълумот беради.
Перуга ташриф буюрган сайёҳлар кўҳна Мачу-Пикчуни кўрмай қайтмайди. Шаҳар денгиз сатҳидан 2 438 метр баландликда жойлашган. Унга 1440 йилда инклар томонидан асос солинган ва 1532 йилда тўсатдан бўшаб қолган дея тахмин қилинади. Шаҳар номи ҳинду тилидан таржима қилинганда «кўҳна чўққи» маъносини беради.
Бугун Мачу-Пикчу дунё сайёҳлари энг кўп ташриф буюрадиган масканлардан бири ҳисобланади. Албатта, шаҳарга кириб келиш ҳам ўзгача, табиат манзараларидан баҳраманд бўлган ҳолда Куско шаҳридан қатновчи поездда орқали уч соатда келиш мумкин. Аммо қизиқувчан сайёҳлар ҳам топилади, тоғли шаҳарга яёв келишни истаганлар инклар очган сўқмоқ бўйлаб бир неча суткада манзилига етади.
Сайёҳлар чўққидаги шаҳарга етиб келгач, кутганидан ҳам ортиқроқ манзарага дуч келади: ўзгача услубда қурилган ибодатхоналар, уйлар, омборлар, расадхона барчанинг ҳайратига сабаб бўлади. Унда жами унда 180 га яқин тарихий иншоот бор. Жонли табиат ҳам ўз мўъжизаларини яширмайди: беозор лама ва альпакаларни кузатиш, Анд тоғларининг гўзал манзараларини кўриш мумкин. Сайёҳлар шаҳарга одатда июндан августгача ташриф буюради. Шаҳарга бир кунда тўрт юздан ортиқ сайёҳ келиши мумкин.
Энг қизиғи, шаҳардаги бинолар қурилишида инк услубидан фойдаланилган бўлиб, силлиқланган турли ўлчамдаги тошлар жипс ёпиштирилган ҳолда қурилган, уларнинг орасига ҳеч қандай аралашма қўшилмаган.
1983 йилда Мачу-Пикчу ЮНЕСКОнинг Бутунжаҳон мероси рўйхатига киритилди ва сайёҳлар энди шаҳарга янада кўпроқ қизиқиш билдира бошлади.
2007 йил 7 июлда эса Мачу-Пикчу шаҳри дунёнинг янги етти мўъжизасидан бири сифатида тан олинди. Перу президенти Алан Гарсиа эса 13 июль санасини байрам сифатида нишонлаш ҳақида фармон имзолади.
Қуйида шаҳар манзараларини ўзида акс эттирган фотосуратлар билан танишасиз.
Изоҳ (0)