Қашқадарё вилоятида коронавирусга чалинган 35 ёшли аёл вафот этди, деб хабар берди Соғлиқни сақлаш вазирлиги.
Қайд этилишича, Қашқадарё вилояти Қарши шаҳрида яшаган 35 ёшли У.Ю. исмли аёл 14 июль куни иситма, ҳансираш ва ҳаво етишмаслиги каби шикоятлар динамикада кучайганлиги сабабли Қарши шаҳар туғруқ комплексининг гинекология бўлимига оғир аҳволда олиб келинган. Бемор инфекционист кўригидан сўнг COVID-19’га шубҳа қилиниб, вилоят пульмонология ва фтизиатрия маркази реанимация бўлимига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир нафас етишмовчилиги асорати билан кечган.
Беморга мутахассислар томонидан онлайн консультация ва консилиумлар ўтказилган, даволаш жараёни белгиланган стандартлар асосида олиб борилган. Аммо беморнинг аҳволи кескин ёмонлаша бошлаган ва интубация қилинган, ўпка-юрак реанимацияси ўтказилган.
Мутахассислар томонидан тўлиқ ҳажмда, стандарт асосида ўтказилган реанимацион муолажаларга қарамасдан бемор ўткир нафас ва юрак-қон томир етишмовчилигидан вафот этган, дейилади ССВ хабарида.
Қашқадарё вилоятининг коронавирус бўйича махсус штабининг «Дарё»га маълум қилишича, вафот этган 35 ёшли аёл ҳомиладор бўлган.
Қарши шаҳрида яшовчи 35 ёшли У.Ю. «Дарё» ҳисоби бўйича коронавирус асоратларидан вафот этган 111-беморга айланди. ССВ статистикаси бўйича 24 июль соат 23:30 ҳолатига кўра, 105 нафар бемор COVID-19 асоратлари оқибатида ҳаётдан кўз юмган. Қашқадарё вилоятининг ўзида COVID-19 асоратлари оқибатида вафот этганлар сони 4 нафарга етган. 23 июль куни Қашқадарёда коронавирусга чалинган 64 ёшли эркак вафот этганди.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. 22 июлда Ўзбекистон бош прокурорининг собиқ ўринбосари Ҳакимбай Халимов 66 ёшида коронавирус асоратларидан вафот этгани, шунингдек, коронавирусга чалинган Қорақалпоғистон Республикаси Қонликўл тумани ҳокими Даулет Толибаевнинг 24 июль куни ҳаётдан кўз юмгани ҳақида хабарлар берилган. Аммо ССВ томонидан ушбу ҳолатлар ҳақида айни вақтгача ахборот берилмади.
Изоҳ (0)