Самарқанд вилоятидан Тошкент шаҳрига кетиш учун «Камаз»га йўловчи сифатида чиққан қиз ҳайдовчининг 6 минг доллар пулини ўғирлади ва воқеа жойидан яширинди. Бу ҳақда «Дарё»га вилоят ИИБ ахборот хизмати хабар берди.

Маълум бўлишича, 2020 йилнинг 16 июль куни соат тахминан 21:30 да 1995 йил Каттақўрғон туманида туғилган Д.Ш. ўзининг «Камаз»да Нарпай тумани Оқтош шаҳридан Тошкент шаҳрига бориш учун йўлга чиққан Тошкент вилояти Янгийўл туманида яшовчи 25 ёшли қиз — С.У.ни йўловчи сифатида миндирган.

«Ўша куни соат тахминан 23:40 да ҳайдовчи Самарқанд шаҳридаги ‘Улуғбек’ автошоҳ бекатига келиб, озиқ-овқат харид қилиш учун автомашинадан тушган. Бу пайтда йўловчи сифатида кетаётган С.У. автомашина ичида бўлган 5340 доллар ва 3 миллион 600 минг сўм пулни яширин равишда талон-торож қилиб, воқеа жойидан яширинган», — дейилади вилоят ИИБ ахборотида.

Самарқанд вилоят ИИБ ахборот хизматининг қўшимча қилишича, Самарқанд шаҳри бўйича ИИО ФМБ 6-сон ИИБ ходимлари томонидан олиб борилган тезкор тадбир натижасида С.У. ушланиб, ундан 800 доллар пул ашёвий далил сифатида олинган.

Мазкур ҳолат юзасидан Самарқанд шаҳри бўйича ИИО ФМБ ҳузуридаги тергов бўлими томонидан Жиноят кодексининг 169-моддаси (Ўғрилик) 2-қисми «б» банди билан жиноят иши қўзғатилиб, дастлабки тергов ҳаракатлари олиб борилмоқда.