Бухоро шаҳрида 24 июль, жума куни янги қурилаётган кўп қаватли уйларнинг канализация қувурларини шаҳарнинг асосий канализация тизимига улаш ишларини олиб бораётган уч нафар ишчи канализациядан чиқаётган газдан заҳарланиб вафот этди, яна бир нафар ишчи касалхонага тушди. Бу ҳақда Ички ишлар вазирлиги ҳузуридаги Тергов департаменти хабар берди.
Маълум қилинишича, 24 июль куни, тахминан, соат 11:00 да «Бухоро махсус сув қурилиш» МЧЖ ходимлари Бухоро шаҳар Жомий кўчасида жойлашган янги қурилаётган кўп қаватли уйларнинг канализация қувурларини шаҳарнинг асосий канализация тизимига улаш ишларини олиб борган.
Улаш ишларида қатнашаётган 47 ёшли А.К. ва 45 ёшли С.Б. қувурларни монтаж қилиш жараёнида канализациядан чиқаётган газлардан заҳарланиши оқибатида соғлиғининг ёмонлашганлиги сабабли ҳушидан кетган. Шу сабабли уларнинг шериги 27 ёшли З.Ш. уларга ёрдам бериш мақсадида канализация қувурига тушган, бироқ у ҳам канализациядан чиқаётган газлардан заҳарланиб ҳушидан кетган.
Воқеага гувоҳ бўлган яна бир ишчи, 41 ёшли С.А. ёрдам бериш мақсадида ушбу қувурга тушиб, заҳарланишдан ҳушидан кетган. Атрофда тўпланган аҳоли томонидан фақатгина С.А. қутқариб қолинган. Унинг шериклари — 47 ёшли А.К., 45 ёшли С.Б. ва 27 ёшли З.Ш. эса ҳодиса жойида канализациядан чиқаётган газлардан заҳарланиб вафот этган. Фуқаро С.А. касалхонага ётқизилган.
Таъкидланишича, ҳодиса жойига тергов гуруҳи чиқиб, воқеа жойини кўздан кечириб, терговолди суриштирув ҳаракатларини олиб бормоқда.
Аввалроқ Тошкентда ёғоч олиб чиқиш учун 6 метрли оқова сув қудуғига тушган икки киши ҳаво етишмаслиги сабабли қудуқдан чиқа олмаган. Улар фавқулодда вазиятлар ходимлари томонидан қутқариб олинган.
Изоҳ (0)