«Икки таблетка билан ҳам тузалиб кетиш мумкин». Коронавирус енгил кечаётган беморларга кўп дори тайинлаш ўринсиз экани таъкидланди

Беморларга кўп дори ёзиб бериш тўғри эмас. Бу ҳақда «Миллий» телеканали орқали ҳар куни соат 18:00 да эфирга узатилаётган «Тез ёрдам» кўрсатувининг 5-сонида тўхталиб ўтилди.

Кўрсатув бошловчиси Комил Алламжонов танишларидан бири шифохонада ётгани, касаллик енгил шаклда кечаётганига қарамай, унга ваҳима остида икки бетлик дорилар рўйхати берилганини таъкидлаган. Унинг бу сўзларига жавобан Вирусология илмий-текшириш институти илмий ходими, тиббиёт фанлари номзоди Раъно Қосимова касаллик тасдиқланганида Комил Алламжоновнинг ўзида ҳам ваҳима бўлганини эслатиб ўтган.

«Масалан, ўзингизда ҳам шунақа ваҳима бўлган. Мен коронавирусга чалинибман, деб қўрқиб кетдингиз», — дея эслатди Қосимова. Бунга жавобан Алламжонов «сиз менга бунча дори ёзиб бермагандингиз», деди. «Тўғри, сизда касалликнинг енгил шакли экани тушунтирилди-да. Касалликнинг кечиши, динамикасига қараб, аҳволингиз оғирлашса, қўшимча дорилар ёзиларди. Агар оғирлашмаса, иккита таблетка билан тузалиб кетишингиз мумкин эди», — дея аниқлик киритди Вирусология институти илмий ходими.

Кўрсатувнинг доимий меҳмонларидан бири вирусолог Дилдора Секлер дори тайинлаш масаласининг бошқа муаммоли жиҳати борлиги таъкидлаб ўтди. «Ростдан ҳам сал қийинроқ масала. Чунки баъзи беморларни шифокор: ‘Сизда касаллик енгил шаклда кечяпти, ҳозир дориларга зарурат йўқ, сув ичинг, мана бундай витаминлар ичсангиз етарли’, деб жўнатиб юборса, бемор: ‘Бу дўхтир ўзи ҳеч нарсани билмас экан-да’, дейиши ҳам мумкин», — деди у. Шундан сўнг кўрсатув бошловчиси фуқароларга ҳам, тиббиёт ходимларига ҳам мурожаат қилди.

Ҳурматли ҳамюртлар! Дорининг кам ёзиб берилгани — бу шифокорларнинг савиясиз эканидан эмас. Ҳар бир ҳолатнинг ўз меъёри бор, меъёридан кўпи — кўп. Аҳамият беринг, касаллик енгил ўтиши мумкин бўлган кўплаб ҳолатларда беморлар кўп дори қабул қилиб, ўзларини оғир аҳволга тушириб қўйишяпти, «нега энди тузалмаяпман?», деб ҳайрон ҳам бўлишяпти.

Ҳурматли шифокорлар, ҳурматли тиббиёт ходимлари! Соғлиқни сақлаш вазирлиги (ССВ) 13 июль куни Жаҳон соғлиқни сақлаш ташкилотининг тавсиясига кўра ишлаб чиқилган янги вақтинчалик протоколни тасдиқлади. Мана шу протокол билан яхшилаб танишиб олишингиз керак. Чунки сиз тайинлаган муолажа усули ССВ тасдиқлаган уйда даволаниш протоколига зид келаётган ҳолатлар бор. Илтимос, одамлар ҳаётига дахлдор маслаҳатлар беришдан аввал ўз устингизда ишлаб, сўнгги янгиликлардан бохабар бўлиб, мумкин ва мумкин бўлмаган дорилар рўйхатини кўриб олинг.

Комил Алламжонов, «Тез ёрдам» кўрсатуви бошловчиси

Ўз навбатида, Дилдора Секлер беморларга поликлиника шифокорларидан бошлаб кучли антибиотикларнинг тайинланиши якунда ушбу беморлар оғир аҳволга тушиб қолганида уларни даволаш имкониятларини кескин камайтириб юбориши мумкинлигидан огоҳлантирди.

«Бизга мурожаат қилаётган фуқароларнинг сўзлари, шунингдек, айрим ҳамкасбларимиз тайинлаган даволаш муолажаларидан келиб чиқиб, бир фикрни билдирмоқчи эдим. Биз бир неча кўрсатувдан бери ‘захира антибиотиклари’ деган тушунча борлигини таъкидлаб келяпмиз. Бу — сўнгги чора, бошқа ҳеч бир дори, антибиотиклар таъсир қилмаганида ёки реанимация шароитида қўлланиладиган восита. Афсуски, айрим ҳамкасбларимиз шундай кучли антибиотикларни поликлиникадан бошлаб фуқароларга тавсия қилишяпти. Бу жуда ҳам нотўғри. Ҳамкасблар, илтимос, бу поликлиника, амбулатор шароитда тавсия этиладиган антибиотиклар эмас. Хирургларимиз, кардиоревматологларимиз, кардиохирургларимиз шундай саволлар беришяпти: ‘Агар ҳозир поликлиникада мана шу антибиотикларни тавсия қила бошлашса, биз унда қандай восита билан ишлаймиз?’. Бу жуда ҳам тўғри савол», — деди Секлер.

Маълумот учун, 19 июлдан бошлаб ҳар куни соат 18:00 да «Миллий ТВ» телеканалида коронавирус инфекцияси билан боғлиқ ҳолатлар юзасидан тушунтириш ва маслаҳатлар бериб боришга ихтисослашган «Тез ёрдам» кўрсатуви эфирга узатилмоқда. Кўрсатувни ижтимоий тармоқлар орқали ҳам жонли эфирда намойиш қилиш мумкин. Кўрсатувнинг 6-сони 24 июль куни соат 18:00 да бошланади.