«Тез ёрдам» кўрсатувининг 23 июль куни эфирга узатилган 5-сонида айни вақтда Ўзбекистонда кузатилаётган пневмония ҳолатларининг коронавирусга қанчалик алоқадор бўлиши мумкинлигига тўхталиб ўтилди.
Кўрсатув бошловчиси Комилл Алламжонов мутахассисларга шундай савол билан мурожаат қилди: «Сўнгги пайтларда шундай гаплар юрибди — коронавирус алоҳида, пневмония алоҳида касаллик сифатида айланиб юрибди, пневмония бўлганларнинг ҳаммаси ҳам коронавирусга чалинмаган. Бу фикр қанчалик тўғри?». Ушбу саволга иммунолог-инфексионист, тиббиёт фанлари номзоди Азиза Хўжаева жавоб берди.
«Бу тўғри гап. Пневмония нафақат вирусли, ҳар бир юқумли касаллик оқибатида ўзининг пневмонияси келиб чиқиши мумкин. Аммо ҳозирги даврда коронавируснинг пневмонияси ўтган-битган пневмония эмас, бу пневмонит, сал бошқачароқ жараён, алвеолаларнинг яллиғланиши. Сал бошқачароқ патогенези бор. Ўша патогенезига нисбатан дексаметазон қўллаш керак. Фақат рентгенга асосланиб пневмония ташхиси қўйилган бўлса, бу оддий бактериологик пневмония ҳам бўлиши мумкин ёки қанақадир бошқа сабабли пневмония бўлиши мумкин. Буни чуқурроқ текшириш ва, албатта, қон таҳлилига асосланиб кўриб чиқиш керак», — деди Азиза Хўжаева.
Ўз навбатида, Соғлиқни сақлаш вазирлиги Вирусология илмий-текшириш институти илмий ходими, тиббиёт фанлари номзоди Раъно Қосимова «дексаметазонни ҳам, капелницаларни ҳам асослаб бериш керак»лигини қўшимча қилиб ўтди. «Таҳлилларни ўтказиб, кислород миқдорини кўриб туриб, нафасини ўлчаб туриб, кейин бу дориларни бериш керак», — дея таъкидлади у.
Маълумот учун, 19 июлдан бошлаб ҳар куни соат 18:00 да «Миллий ТВ» телеканалида коронавирус инфекцияси билан боғлиқ ҳолатлар юзасидан тушунтириш ва маслаҳатлар бериб боришга ихтисослашган «Тез ёрдам» кўрсатуви эфирга узатилмоқда. Кўрсатувни ижтимоий тармоқлар орқали ҳам жонли эфирда намойиш қилиш мумкин. Кўрсатувнинг 6-сони 24 июль куни соат 18:00 да бошланади.
Изоҳ (0)