“Ikki tabletka bilan ham tuzalib ketish mumkin”. Koronavirus yengil kechayotgan bemorlarga ko‘p dori tayinlash o‘rinsiz ekani ta’kidlandi

Bemorlarga ko‘p dori yozib berish to‘g‘ri emas. Bu haqda “Milliy” telekanali orqali har kuni soat 18:00 da efirga uzatilayotgan “Tez yordam” ko‘rsatuvining 5-sonida to‘xtalib o‘tildi.

Ko‘rsatuv boshlovchisi Komil Allamjonov tanishlaridan biri shifoxonada yotgani, kasallik yengil shaklda kechayotganiga qaramay, unga vahima ostida ikki betlik dorilar ro‘yxati berilganini ta’kidlagan. Uning bu so‘zlariga javoban Virusologiya ilmiy-tekshirish instituti ilmiy xodimi, tibbiyot fanlari nomzodi Ra’no Qosimova kasallik tasdiqlanganida Komil Allamjonovning o‘zida ham vahima bo‘lganini eslatib o‘tgan.

“Masalan, o‘zingizda ham shunaqa vahima bo‘lgan. Men koronavirusga chalinibman, deb qo‘rqib ketdingiz”, — deya eslatdi Qosimova. Bunga javoban Allamjonov “siz menga buncha dori yozib bermagandingiz”, dedi. “To‘g‘ri, sizda kasallikning yengil shakli ekani tushuntirildi-da. Kasallikning kechishi, dinamikasiga qarab, ahvolingiz og‘irlashsa, qo‘shimcha dorilar yozilardi. Agar og‘irlashmasa, ikkita tabletka bilan tuzalib ketishingiz mumkin edi”, — deya aniqlik kiritdi Virusologiya instituti ilmiy xodimi.

Ko‘rsatuvning doimiy mehmonlaridan biri virusolog Dildora Sekler dori tayinlash masalasining boshqa muammoli jihati borligi ta’kidlab o‘tdi. “Rostdan ham sal qiyinroq masala. Chunki ba’zi bemorlarni shifokor: ‘Sizda kasallik yengil shaklda kechyapti, hozir dorilarga zarurat yo‘q, suv iching, mana bunday vitaminlar ichsangiz yetarli’, deb jo‘natib yuborsa, bemor: ‘Bu do‘xtir o‘zi hech narsani bilmas ekan-da’, deyishi ham mumkin”, — dedi u. Shundan so‘ng ko‘rsatuv boshlovchisi fuqarolarga ham, tibbiyot xodimlariga ham murojaat qildi.

Hurmatli hamyurtlar! Dorining kam yozib berilgani — bu shifokorlarning saviyasiz ekanidan emas. Har bir holatning o‘z me’yori bor, me’yoridan ko‘pi — ko‘p. Ahamiyat bering, kasallik yengil o‘tishi mumkin bo‘lgan ko‘plab holatlarda bemorlar ko‘p dori qabul qilib, o‘zlarini og‘ir ahvolga tushirib qo‘yishyapti, “nega endi tuzalmayapman?”, deb hayron ham bo‘lishyapti.

Hurmatli shifokorlar, hurmatli tibbiyot xodimlari! Sog‘liqni saqlash vazirligi (SSV) 13-iyul kuni Jahon sog‘liqni saqlash tashkilotining tavsiyasiga ko‘ra ishlab chiqilgan yangi vaqtinchalik protokolni tasdiqladi. Mana shu protokol bilan yaxshilab tanishib olishingiz kerak. Chunki siz tayinlagan muolaja usuli SSV tasdiqlagan uyda davolanish protokoliga zid kelayotgan holatlar bor. Iltimos, odamlar hayotiga daxldor maslahatlar berishdan avval o‘z ustingizda ishlab, so‘nggi yangiliklardan boxabar bo‘lib, mumkin va mumkin bo‘lmagan dorilar ro‘yxatini ko‘rib oling.

Komil Allamjonov, “Tez yordam” ko‘rsatuvi boshlovchisi

O‘z navbatida, Dildora Sekler bemorlarga poliklinika shifokorlaridan boshlab kuchli antibiotiklarning tayinlanishi yakunda ushbu bemorlar og‘ir ahvolga tushib qolganida ularni davolash imkoniyatlarini keskin kamaytirib yuborishi mumkinligidan ogohlantirdi.

“Bizga murojaat qilayotgan fuqarolarning so‘zlari, shuningdek, ayrim hamkasblarimiz tayinlagan davolash muolajalaridan kelib chiqib, bir fikrni bildirmoqchi edim. Biz bir necha ko‘rsatuvdan beri ‘zaxira antibiotiklari’ degan tushuncha borligini ta’kidlab kelyapmiz. Bu — so‘nggi chora, boshqa hech bir dori, antibiotiklar ta’sir qilmaganida yoki reanimatsiya sharoitida qo‘llaniladigan vosita. Afsuski, ayrim hamkasblarimiz shunday kuchli antibiotiklarni poliklinikadan boshlab fuqarolarga tavsiya qilishyapti. Bu juda ham noto‘g‘ri. Hamkasblar, iltimos, bu poliklinika, ambulator sharoitda tavsiya etiladigan antibiotiklar emas. Xirurglarimiz, kardiorevmatologlarimiz, kardioxirurglarimiz shunday savollar berishyapti: ‘Agar hozir poliklinikada mana shu antibiotiklarni tavsiya qila boshlashsa, biz unda qanday vosita bilan ishlaymiz?’. Bu juda ham to‘g‘ri savol”, — dedi Sekler.

Ma’lumot uchun, 19-iyuldan boshlab har kuni soat 18:00 da “Milliy TV” telekanalida koronavirus infeksiyasi bilan bog‘liq holatlar yuzasidan tushuntirish va maslahatlar berib borishga ixtisoslashgan “Tez yordam” ko‘rsatuvi efirga uzatilmoqda. Ko‘rsatuvni ijtimoiy tarmoqlar orqali ham jonli efirda namoyish qilish mumkin. Ko‘rsatuvning 6-soni 24-iyul kuni soat 18:00 da boshlanadi.