Коронавирусга чалинган тошкентлик 73 ёшли бемор ўткир нафас ва юрак қон-томир етишмовчилигидан вафот этди. Бу ҳақда Соғлиқни сақлаш вазирлиги хабар берди.
Маълум қилинишича, Тошкент шаҳри Сергели туманида яшаган 73 ёшли аёл Г.Р.да жорий йил 9 июль куни COVID-19 тасдиқланган ва Зангиота кўп тармоқли юқумли касалликлар шифохонасига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Хасталик ўткир нафас ва юрак етишмовчилиги асоратлари билан кечган.
Шунингдек, бемор юрак ишемик касаллиги, стенокардия, гипертония, бош мияда сурункали қон айланишининг бузилиши, сурункали пиелонефрит, сурункали холетцистит каби ҳамроҳ касалликлар билан ҳам оғриган.
Шифохонада беморнинг даволаниши давомида шифокорлар томонидан онлайн консультация ва консилиумлар қилинган, даволаш жараёни мутахассислар тавсияси асосида олиб борилган.
Асосий касаллик асоратлари ҳисобига беморнинг аҳволи кескин оғирлашиб, шифокорлар томонидан стандартлар асосида ўтказилган реанимацион муолажаларга қарамасдан ўткир нафас ва юрак қон-томир етишмовчилигидан вафот этган.
Соғлиқни сақлаш вазирлиги статистикасига кўра, Г.Р. коронавируснинг Ўзбекистондаги 104-қурбонига айланди. «Дарё» ҳисоби бўйича эса коронавирусдан вафот этганлар сони 109 нафарга етди.
Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 22 июлда Ўзбекистон бош прокурорининг собиқ ўринбосари Ҳакимбай Халимов 66 ёшида коронавирус асоратларидан вафот этгани хабар қилинган. Бироқ ССВ томонидан ушбу ҳолатлар ҳақида айни вақтгача ахборот берилмаган.
Изоҳ (0)