Тошкент шаҳар ички ишлар бош бошқармаси 21 июль куни Тошкент шаҳри Чилонзор туманида кузатилган ёшларнинг жанжали юзасидан тафсилотларни маълум қилди.
Бошқарма хабари бўйича 21 июль куни соат 14:30 да 102 рақамига Чилонзор туманининг 3-мавзесидаги Чўпонота кўчасида АҚШнинг Ўзбекистондаги элчихонаси собиқ биносининг яқинида ўндан ортиқ ёшлар жанжаллашаётгани аниқланган.
Ҳодиса жойига Тошкент шаҳар ИИББ ППХ бригадаси 4-батальони ходимлари етиб борган. Патруль автомобилини кўрган ёшларнинг бир нечтаси қочиб кетган, етти нафари қўлга олинган.
Гумонланувчилар энг яқин ички ишлар бўлимига олиб келинган. Қўлга олинганлардан бири – муқаддам судланган 28 ёшли Э.Ш. текширилганда унинг автомобили салонидан учта пичоқ, барсеткасидан эса 3 флакон «Тропикамид», 1 флакон «Риноксил», 6 та «Селофен» дорилари топилган.
Чилонзор тумани ИИО ФМБ 4-сон ички ишлар бўлими томонидан текширув ўтказилмоқда. Текширув давомида ҳодисанинг бошқа иштирокчиларининг шахслари аниқланиб, сўнг барча иштирокчиларнинг хатти-ҳаракатларига ҳуқуқий баҳо берилади, дейилган Тошкент шаҳар ИИББ хабарида.
Аввал Тошкент шаҳрида 16 ёшли йўловчининг iPhone Х телефонини олиб қўйиб, ўзини кўчада қолдириб кетган ҳайдовчининг қўлга тушгани, Тошкент шаҳар Олмазор туманидаги билярдхонада тунги вақтда жанжал келтириб чиқарган шахсларга жиноий иш очилгани, Тошкентнинг Сергели туманида жойлашган Янги Чоштепа даҳасида олиб борилаётган қурилиш ишлари ҳудудида қурувчилар ўртасида оммавий муштлашувда иштирок этган беш нафар қурувчи 10 суткага қамалгани ҳақида хабарлар берилган.
Изоҳ (0)