Самарқанд вилояти соғлиқни сақлаш бошқармаси бошлиғи Давронбек Жуманиёзовнинг маълум қилишича, коронавирусга чалиниб касалхонага тушган беморларнинг яқинлари томонидан шифокорларга қўнғироқ қилиш ҳолатлари жуда кўп кузатилмоқда ва бу шифокорларнинг ишига халақит бермоқда.
Мутахассиснинг таъкидлашича, унинг ўзига ҳам кўп қўнғироқлар бўлади. Беморларнинг яқинлари уларга яхши қаралмаётганидан шикоят қилади, қайсидир таниш шифокори маълум бир дорини қўллаш зарурлигини айтгани ҳақида гапиради.
«Биз халқимиз хабар олиб турсин, деб телефонларни олиб киришга рухсат берганмиз. Лекин баъзида телефонлар бизнинг ишларимизга халақит бермоқда», — деди ССБ раҳбари.
Бошқарма бошлиғининг маълум қилишича, коронавирус билан касалланиб, шифохонага келган бемор аниқ белгиланган протоколлар асосида даволанади. Соғлиқни сақлаш вазирлиги ва Жаҳон соғлиқни сақлаш ташкилоти томонидан белгиланган протокол мавжуд бўлиб, мазкур протоколдан ташқарида бўлган дорилардан фойдаланилмайди.
Мавзуга доир: Самарқанд вилоят ССБ раҳбари ҳозирда аниқланаётган коронавирус беморлари 100 фоиз аҳоли орасидан чиқаётганини айтди
Қоидага кўра, касаллик аниқланганларнинг хонадонига дастлаб мобил гуруҳлар бориб, беморнинг касалхонада ёки уйда даволаниши юзасидан қарор қилади. Бемор касалхонага ётқизилиши керак бўлса, тез тиббий ёрдам жўнатилади. Уйда даволаниш имконияти бўлмаганларни эса тўғридан-тўғри тез тиббий ёрдамда касалхонага олиб борилади.
«Шундай бўлса ҳам мени биринчи ётқизишинг керак, менинг қариндошимни/танишимни биринчи ётқизишинг керак, мазмунидаги жуда кўп қўнғироқлар бўлиб, баъзан бизнинг ишлашимизга ҳам халақит беришмоқда», — деди бошқарма бошлиғи.
Изоҳ (0)