Самарқанд вилояти соғлиқни сақлаш бошқармаси бошлиғи Давронбек Жуманиёзовнинг билдиришича, аҳолидан тез тиббий ёрдамга келаётган мурожаатларнинг катта қисми тана ҳарорати ошиши ва ҳаво етишмаслиги билан боғлиқ. Мурожаат қилаётганлар коронавирус аломатлари кузатилмаса ҳам тиббий ёрдамга мурожаат қилмоқда.
Унинг сўзларига кўра, аввал тез ёрдамга кунига 1800-2000 та чақириқ тушган бўлса, ҳозирги кунда чақириқларнинг кунлик сони 3000-3500 тага етмоқда.
Чақириқлар сонининг кўпайгани ҳисобга олиниб, ҳудудлардаги оилавий поликлиникаларда мобил гуруҳлар ташкил қилинди. Мобил гуруҳлар тана ҳарорати кўтарилган фуқароларни бориб кўради.
Мавзуга доир: Тошкентда 74 та кўп тармоқли марказий ва оилавий поликлиника аҳолига кун-у тун хизмат кўрсатиш тизимига ўтказилди
Тез ёрдамга қўнғироқларни қабул қилувчи операторлар сони 8 нафардан 24 нафарга етказилган. Шунингдек, коронавирус билан боғлиқ саволларга жавоб бериш учун вилоят Соғлиқни сақлаш бошқармаси ҳузурида +998557101003, +998557107707 рақамлари орқали Call-марказ ишламоқда. Мазкур марказ имкониятларига қўшимча равишда Самарқанд давлат тиббиёт институти қошида ҳам 1105 рақамида Call-марказ ташкил этилган.
Аввалроқ Самарқанд автомобиль заводида Isuzu D-Max пикапи базасида тез ёрдам машиналари ишлаб чиқарилиши маълум қилинганди, улардан 27 таси Тошкент шаҳрига етказиб берилади. Шунингдек, Жиззах автомобиль заводи Volkswagen Caddy базасида махсус жиҳозланган тез ёрдам автомобилларини етказиб беришни бошлади.
Изоҳ (0)