Андижон вилояти Санитария-эпидемиологик осойишталик маркази мансабдор шахслари дезинфекцияловчи воситалар харид қилиш жараёнида 159,3 миллион сўмлик бюджет маблағларини талон-торож қилгани аниқланди. Бу ҳақда «Дарё»га Бош прокуратура томонидан маълум қилинди.
Бош прокуратура ҳузуридаги Иқтисодий жиноятларга қарши кураш департаментининг Андижон вилоят бошқармаси томонидан терговга қадар текширув ўтказилган.
Аниқланишича, вилоят Санитария-эпидемиологик осойишталик маркази мансабдор шахслари «Т.Д.Ф» МЧЖ билан тузилган шартномага мувофиқ қиймати 326,4 миллион сўм бўлган «Гипохлорид кальций 65 фоиз» дезинфекцияловчи воситасини 485,7 миллион сўмга, яъни ўртача бозор нархидан 159,3 миллион сўм қимматга сотиб олган. Шу тариқа вилоят СЭОМ мансабдорлари жуда кўп миқдордаги бюджет маблағларини талон-торож қилган.
Мазкур ҳолат юзасидан марказнинг мансабдор шахсларига нисбатан Жиноят кодексининг 167-моддаси 3-қисми «а» банди (Ўзлаштириш ёли растрата йўли билан талон-торож қилиш) ва 205-моддаси 2-қисми «а» (Ҳокимият ёки мансаб ваколатини суиистеъмол қилиш) банди билан жиноят иши қўзғатилиб, тергов ҳаракатлари ўтказилмоқда.
Бундан аввал Қашқадарё вилояти Санитария-эпидемиология осойишталик марказида қарийб 918 миллион сўмлик бюджет маблағлари талон-торож қилингани аниқланганди. Шунингдек, Навоий вилояти Санитария ва эпидемиология осойишталик маркази мансабдор шахслари Молия вазирлиги ҳузуридаги Инқирозга қарши курашиш жамғармаси ҳисобидан ажратилган 500 миллион сўмдан ортиқ маблағни ўзлаштирган. Қорақалпоғистон Республикаси Хўжайли туманидаги Санитария-эпидемиология осойишталик марказини таъмирлаш ишлари жараёнида 189,2 миллион сўм маблағ талон-торож қилинган.
Наманган вилоят Санитария-эпидемиология осойишталик маркази мансабдор шахслари 250 миллион сўм маблағни талон-торож қилган, шунингдек, мазкур СЭОМ иқтисодчиси 40 миллион сўм пора билан қўлга тушган. Бухородаги коронавирус беморлари даволанаётган шифохонани таъмирлашда 577 миллион сўм талон-торож қилинган
Молия вазирлигининг Давлат молиявий назорати департаменти томонидан 2020 йилнинг биринчи ярим йиллигида 2 584 та молиявий назорати тадбирлари ўтказилиб, натижада 81,7 миллиард сўм миқдоридаги бюджет пуллари ноқонуний сарфлангани аниқланган.
Изоҳ (0)