Самарқанд шаҳрида жойлашган «Регистон» меҳмонхонасида коронавирусга гумон қилинган фуқароларни сақлаш ва касаллик аниқланган беморларни тақсимлаш маркази ташкил қилинди. Бу ҳақда Самарқанд вилояти соғлиқни сақлаш бошқармаси бошлиғи Давронбек Жуманиёзов маълум қилди.
Шу вақтга қадар коронавирус аломатлари кузатилаётган ва касалликни аниқлаш учун тест топширган, бироқ тест жавоби чиқмаган фуқаролар ўз уйида сақланаётган эди.
Самарқанд вилояти ҳокимлиги мазкур фуқароларни сақлаш учун «Регистон» меҳмонхонасини ажратиб берган. Коронавирусга гумон қилинган кишилар мазкур меҳмонхонада ташкил қилинган тақсимлаш марказига жойлаштирилади. Улардан тест олинади, ўпкаси рентген қилинади. Касаллик аниқланган фуқаролар улардаги касалликнинг даражасига қараб тегишли касалхона ва бўлимларга жўнатилади.
Шунингдек, вилоят ҳокимлиги томонидан дори воситалари захирасини шакллантириш учун 5 миллиард сўм ажратилган.
Эслатиб ўтамиз, Тошкент шаҳридаги «Ўзэкспомарказ» кўргазма маркази майдонларида коронавирусга чалингани гумон қилинган беморларга аниқ ташхис қўйиш ва касаллик даражасини аниқлаш, шунингдек, беморларга биринчи ёрдам кўрсатиш ва уларни клиникаларга тақсимлаш маркази ташкил этилмоқда. Тақсимлаш маркази 500 ўринга мўлжалланган бўлиб, у ерга тиббиёт ходимларини ишга қабул қилиш жараёни бошланган.
Изоҳ (0)