Ўзбекистонда 19 июль соат 23:30 дан 20 июль соат 23:30 га қадар коронавирус юқтириб олиш билан боғлиқ 562 та ҳолат қайд этилди. Кетма-кет тўртинчи кун коронавирусга чалинганлар сони 500 нафардан ошмоқда. Ҳозиргача энг кўп касалланиш ҳолати 13 июль куни қайд этилган бўлиб, ўша куни 594 кишида коронавирус инфекцияси аниқланган. Янги касалланиш ҳолатларидан сўнг Ўзбекистонда коронавирусга чалинганлар сони 17314 кишига етди.
Янги касалланиш ҳолатлари
Янги касалланганларнинг- 63 нафари хориждан келиб карантинга олинганлар орасида;
- 499 нафари тана ҳарорати кўтарилганлиги туфайли профилактика мақсадида ҳамда коронавирусга чалинган беморлар билан мулоқотда бўлганлиги сабабли намуна олинган фуқаролар орасида (Тошкент шаҳрида — 365 нафар, Андижон вилоятида — 32 нафар, Наманган вилоятида — 26 нафар, Сирдарё вилоятида — 23 нафар, Жиззах вилоятида — 13 нафар, Қорақалпоғистон Республикасида — 11 нафар, Сурхондарё вилоятида — 10 нафар, Фарғона вилоятида — 6 нафар, Навоий вилоятида — 5 нафар, Тошкент вилоятида — 4 нафар, Самарқанд вилоятида — 4 нафар) аниқланган.
Тошкент шаҳрида тана ҳарорати кўтарилганлиги туфайли профилактика мақсадида ҳамда коронавирусга чалинган беморлар билан мулоқотда бўлганлиги сабабли намуна олинган фуқаролар орасида 365 та ҳолат қайд этилди. Пойтахтда бундан ҳам кўп бемор аниқланган кун фақатгина бир марта бўлган. 13 июль куни Тошкентда 448 кишида коронавирус қайд этилганди.
Андижон вилоятида 32 кишида коронавирус қайд этилди. Ой бошида Андижонда касалланганлар сони 209 нафар эди, ортда қолган 20 кун ичида вилоятда 473 кишида касаллик аниқланди. Шунга қарамай, Андижон коронавирусдан биронтаям ўлим қайд этилмаган ягона ҳудуд бўлиб турибди.
Наманган вилоятида коронавирус юқтириб олиш билан боғлиқ 26 та ҳолат аниқланди. Вилоятда 12 июлдан бери ҳар куни янги касалланиш ҳолатлари аниқланмоқда. Наманганда июль ойида 244 кишида коронавирус қайд этилди, бу вилоятдаги жами касалланиш ҳолатларининг 45 фоизидир.
Сирдарё вилоятида кун давомида 23 кишида коронавирус қайд этилди. 4 кун ичида вилоятда коронавирусга чалинганлар сони 174 нафарга кўпайди. Ҳозирда жами касалланганлар сони 387 нафарни ташкил этади. Сирдарё вилояти ҳокими Ғофуржон Мирзаев вилоят аҳолисига қилган мурожаатида касалланган беморлар ҳақида бир қатор маълумотларни эълон қилди. Вилоятда касаллик аниқланган 385 кишидан 140 нафари «Гулистон» чегара постидан ўтган халқаро юк ташувчилар ҳамда чет давлатлардан келган фуқаролар бўлса, қолган 245 нафари Сирдарё вилояти фуқаролари эканлиги маълум бўлди. Шунингдек, ҳоким вилоятдаги 224 та маҳалладан 97 тасида касаллик аниқланганини таъкидлади. Ҳозирда Сирдарёда 3 минг кишига етадиган захира ўринлари шакллантирилган.
Жиззах вилоятида 13 кишида коронавирус аниқланди. Жиззах коронавирус аниқланган беморлар сони 100 нафардан ошган охирги ҳудуд бўлди. Ҳозирда вилоятда касалликка чалинганлар сони 108 нафарни ташкил этмоқда. Ой бошидан бери Жиззахда касалланганлар сони 10 баравардан ортиққа кўпайди. 30 июнь ҳолатига кўра, вилоятда бор-йўғи 10 нафар бемор бор эди.
Қорақалпоғистон Республикасида коронавирусга чалинган беморлар билан мулоқотда бўлганлиги сабабли намуна олинган фуқаролар орасида 11 кишида касаллик аниқланган. Республикада ой бошидан бери жами 135 кишида коронавирус аниқланиб, жами касалланганлар сони 286 нафарга етди. Қорақалпоғистондаги жами касалланиш ҳолатларининг 47 фоизи июль ойига тўғри келди.
Сурхондарё вилоятида 10 кишида коронавирус инфекцияси қайд этилди. 14 июлдан бери ҳар куни янги ҳолатлар қайд этилмоқда. Ой бошидан бери Сурхондарёда 192 кишида коронавирус аниқланди. Вилоятда март, апрель, май ва июнь ойларида қанча касаллик аниқланган (101 та) бўлса, июль ойининг ўзида ундан қарийб 1,9 баравар кўп янги ҳолатлар қайд этилди.Фарғона вилоятида 16 июлдан бери энди янги ҳолатлар қайд этилди ва 6 кишида коронавирус аниқланди. 15 июлдаги видеоселекторда Президент коронавирус билан боғлиқ мураккаб вазиятдан чиқиб кетиш бўйича Андижон, Наманган ва Самарқанд вилоятлари қаторида Фарғонани ҳам мисол қилиб келтириб, оғир шароитдан мазкур ҳудудлардаги биринчи раҳбарлар фидойилиги, қаттиққўллиги учун чиқиб кетилганини таъкидлаганди. Ҳозир шифохоналардаги энг кам бемор айнан Фарғона вилоятидадир. Улар орасида биронтаям оғир ёки ўта оғир аҳволдаги бемор йўқ. Шунга қарамай, вилоят энг оғир вазиятга ҳам тайёр туриш учун 9600 та захира ўрни тайёрлашга киришган. Эслатиб ўтамиз, 16 июль куни Фарғона вилояти ҳокими Шуҳрат Ғаниев Бувайда туманидаги экин майдонларида карам етиштираётган болани карантин қоидаларига зид равишда бағрига босгани хабар қилинганди.
Навоий вилоятида 5 та янги ҳолат коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган. Навоийда июль ойида 94 кишида коронавирус аниқланди. Бу вилоятдаги жами касалланиш ҳолатларининг 25 фоизига тенг.
Тошкент вилоятида 4 кишида коронавирус аниқланди. 17 июлдан бошлаб Соғлиқни сақлаш вазирлиги Тошкент вилоятининг кўрсаткичларини Тошкент шаҳридан алоҳида бера бошлади. Ўша куни вилоятда биронтаям янги ҳолат аниқланмаганди, 18 июль куни 22 кишида, 19 июлда 31 кишида коронавирус қайд этилди. Ҳозир Тошкент вилояти касалланганлар сони (1735 нафар) бўйича Тошкент шаҳридан кейин иккинчи ўринда турибди.
Самарқанд вилоятида коронавирусга чалинган беморлар билан мулоқотда бўлганлиги сабабли намуна олинган фуқаролар орасида 4 кишида инфекция қайд этилди. Вилоятда июль ойи бошидан бери 287 кишида касаллик тасдиқланган. Бу жами касалланиш ҳолатларининг 39 фоизига тенг.
Ўлим ҳолатлари ва аҳволи оғир беморлар
19 июль куни Олмазор тумани ҳокимлиги «Мирзо Ғолиб» маҳалласида жойлашган 18-оилавий поликлиника катта ҳамшираси Феруза Асқаровна Тўхтаева коронавирус инфекцияси асоратлари оқибатида вафот этганини маълум қилганди. 20 июль куни Соғлиқни сақлаш вазирлиги ушбу ўлим ҳолатини тасдиқлади. Бундан ташқари, ССВ 20 июль куни 3 та янги ўлим ҳолати ҳақида хабар берди. Шунингдек, Олмалиқда бир неча кун олдин вафот этган икки аёлда ўлимидан сўнг коронавирус тасдиқлангани маълум бўлди.
Биринчи ўлим. Тошкент шаҳри Юнусобод туманида яшовчи 51 ёшли V.Т. исмли эркакда 5 июль куни COVID-19 тасдиқланган ва у Эпидемиология, микробиология ва юқумли касалликлар илмий-текшириш институти клиникасига ётқизилган.
Унга COVID-19 инфекцияси, икки томонлама пневмония ташхиси қўйилган. Хасталик сепсис, ўткир нафас ва юрак-қон томир, полиорган етишмовчилиги каби асоратлар билан кечган. Шунингдек, бемор юрак ишемик касаллиги, зўриқиш стенокардияси ҳамроҳ касалликлари билан ҳам оғриган.
Шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир нафас ва юрак-қон томир етишмовчилигидан вафот этган.
Иккинчи ўлим. Тошкент шаҳри Учтепа туманида яшаган 42 ёшли С.С. исмли эркакда 17 июль куни COVID-19 тасдиқланган ва у ўта оғир аҳволда Вирусология илмий-текшириш институти клиникаси реанимация бўлимига ётқизилган ва сунъий нафас олдириш аппаратига ўтказилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Беморда касаллик сепсис, ўткир нафас етишмовчилигининг 4-даражаси, ўткир юрак-қон томир етишмовчилиги, полиорган етишмовчилиги каби асоратлар билан кечган. Шунингдек, у юрак ишемик касаллиги, ‘стабиль’ зўриқиш стенокардияси, қандли диабетнинг декомпенсация босқичи каби ҳамроҳ хасталиклар билан ҳам оғриган.
Ҳамроҳ касалликлар фонида касаллик асоратлари ҳисобига беморнинг аҳволи кескин оғирлашиб, шифокорлар томонидан стандартлар асосида ўтказилган реанимацион муолажаларга қарамасдан у ўткир нафас ва юрак-қон томир етишмовчилигидан вафот этган.
Учинчи ва тўртинчи ўлим. 20 июль куни Олмалиқ ҳокимлиги матбуот хизмати Эпидемияга қарши кураш бўйича шаҳар фавқулодда комиссиясининг 19 июль ҳолати бўйича эпидемиологик вазиятга доир ахборотини эълон қилди. Унда таъкидланишича, эпидемия бошидан бери шаҳарда жами 28 кишида коронавирус инфекцияси тасдиқланган, касаллик асоратлари оқибатида иккита ўлим ҳолати юз берган.
Олмалиқда коронавирус инфекцияси асоратлари оқибатидаги биринчи ўлим 9 июль куни қайд этилган. «1969 йилда туғилган аёл 6 июль куни икки томонлама бронхопневмония ташхиси билан шифохонага ётқизилган. Бемордаги клиник белгилар коронавирусга ўхшаш бўлгани, жумладан, тана ҳарорати кўтарилгани сабаб 8 июль куни ундан коронавирусга тест олинган. Бемор 9 июль куни Олмалиқ шаҳар юқумли касалликлар шифохонасида вафот этган, тест натижаси (мусбат) ўлимидан сўнг чиққан», — дея шаҳар СЕОМ раҳбари Фаррухбек Мусаев «Дарё»га маълум қилди.
Олмалиқ шаҳридаги иккинчи ўлим 15 июль куни қайд этилган. «1957 йилда туғилган аёлда 13 июль куни икки томонлама бронхопневмония тасдиқланган, унга умумий амалиёт шифокори томонидан шифохонада даволаниш учун йўлланма берилган, бироқ бемор йўлланмани рад этган ва уй назоратида даволанишни давом эттирган. Аҳволи оғирлашгач, 15 июль куни Олмалиқ шаҳар тиббиёт бирлашмасининг реанимация бўлимига ётқизилган, бироқ кўрсатилган тиббий ёрдамга қарамай, шу куни вафот этган. Ундан олинган тест натижаси (мусбат) ҳам ўлимидан сўнг чиққан», — деди Фаррух Мусаев.
Олмалиқдаги ўлим ҳолатлари ССВ томонидан ҳозирча тасдиқланмаган. Ҳокимлик расмийлари ушбу ўлим ҳолатлари ССВ томонидан нима учун маълум қилинмаётгани уларнинг ўзи учун ҳам тушунарсиз эканини таъкидлади.
Бешинчи ўлим. Тошкент шаҳри Миробод туманида яшаган 52 ёшли А.Х. исмли эркак Россияда чап ўпка юқори бўлаги ўсмасини даволаш ва кимётерапия муолажаларидан сўнг 5 июнь куни Ўзбекистонга қайтган. Беморда ҳолсизлик, кўкрак қафасида оғриқлар кузатилган ва у 15 июнь куни Яккасарой тумани тиббиёт бирлашмаси стационарига ётқизилган.
Унда 27 июнь куни COVID-19 инфекцияси борлиги тасдиқланган ва бемор Эпидемиология, микробиология ва юқумли касалликлар илмий-текшириш институти клиникасига ўтказилган. А.Х.га COVID-19 инфекциясининг оғир кечиши, икки томонлама пневмония ташхиси қўйилган. Хасталик сепсис, ўткир нафас етишмовчилигининг 2-даражаси каби асоратлар билан кечган. Шунингдек, бемор ўпка саратони, гипертония ҳамроҳ касалликлари билан ҳам оғриган.
Шифокорлар томонидан стандартлар асосида ўтказилган реанимацион муолажаларга қарамай, А.Х.нинг аҳволи кескин оғирлашган. У ўткир нафас ва юрак-қон томир етишмовчилигидан вафот этган.
Ҳозиргача Соғлиқни сақлаш вазирлиги 91 кишининг коронавирус асоратларидан вафот этганини хабар берди. «Дарё» ҳисоби бўйича коронавирус чалингач вафот этганлар сони 95 нафарни ташкил этмоқда. Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берди. Бироқ ушбу ҳолатлар ҳақида ССВ томонидан айни вақтгача ахборот берилгани йўқ.
Шунингдек, таниқли режиссёр Сарвар Каримов 17 июль куни отаси коронавирус инфекциясидан вафот этгани, аммо унга ташхис қўйилмаганини маълум қилганди. Ижтимоий тармоқларда «Саноатқурилишбанк»нинг Олмазор тумани ходими Умида Усмонова 17 июль куни коронавирусдан вафот этгани хабар тарқалди. Банк матбуот хизматининг «Дарё»га маълум қилишича, ходим икки томонлама пневмония оқибатида ҳаётдан кўз юмган, унинг коронавирусга топширган тести жавоби ҳали чиқмаган.
Президент Шавкат Мирзиёев 20 июлдаги видеоселекторда коронавирусдан ўлим ҳолатларининг 80 фоизи Тошкент шаҳрига тўғри келаётганини таъкидлаб ўтди. ССВ статистикаси бўйича ҳозиргача коронавирус асоратларидан 91 киши вафот этган, улардан 53 нафари Тошкент шаҳрида қайд этилган. ССВ маълумотлари бўйича Тошкент шаҳридаги ўлим ҳолатлари 58 фоизни ташкил этмоқда. Бир кун олдин эса бу кўрсаткич 56 фоизга тенг бўлган.
Айни пайтда тиббиёт муассасаларида даволанаётган 7 760 нафар бемордан 79 нафари оғир, 29 нафари эса ўта оғир аҳволда. Бир кун аввал аҳволи оғир беморлар сони 81, аҳволи ўта оғир беморлар 23 нафарни ташкил этаётганди. Сирдарё, Фарғона ва Навоий вилоятлари ҳокимлари ўз ҳудудида ўта оғир аҳволдаги беморлар йўқлигини маълум қилди.
Касалликдан даволаниш
20 июль куни 184 нафар бемор коронавирусдан соғайган. Улардан- 69 нафари Тошкент шаҳридаги тиббиёт муассасаларида;
- 46 нафари Самарқанд вилоятида;
- 44 нафари Андижон вилоятида;
- 14 нафари Бухоро вилоятида;
- 11 нафари Жиззах вилоятида коронавирус инфекциясидан тузалган.
Ўзбекистонда коронавирус эпидемияси сабаб соғлиқни сақлаш тизимига тушаётган юкламани бир қадар енгиллатиш мақсадида 5 июлдан бошлаб коронавирус инфекцияси аломатсиз кечаётган беморларга уй шароитида даволанишга рухсат берилган, ушбу йўналишда йўриқнома ва эслатмалар ҳам эълон қилинган.
Бироқ Соғлиқни сақлаш вазирлиги коронавирусга чалинганларга доир ахборотларида янги беморларнинг қанчасида касаллик аломатсиз (симптомсиз) кечаётганига аниқлик киритмаяпти, шу боисдан айни вақтда коронавирусдан даволанаётган беморларнинг қанчаси касалхоналарда қолаётгани, қанчаси уй шароитида даволанаётгани маълум эмас.
Ғофуржон Мирзаев 20 июль куни Сирдарё вилояти аҳолисига қилган мурожаатида уй шароитида даволанаётган беморлар бўйича маълумот берди. Ҳокимнинг сўзларига кўра, вилоятда коронавирусдан даволанаётган 190 нафар фуқародан 57 нафари стационар шароитда, қолган 133 нафари уй шароитда даволанишда бўлиб турибди. Уй шароитида даволанган 22 нафар бемор касалликдан тузалишга муваффақ бўлган.
Соғлиқни сақлаш вазирлиги маълумотлари бўйича айни пайтда 7760 нафар бемордан 5595 нафари Тошкент шаҳрида даволанмоқда. Фарғонада 18, Хоразмда 17, Жиззахда 43, Навоийда 52, Қорақалпоғистонда 90, Бухорода 85, Қашқадарёда 75, Наманганда 154, Сурхондарёда 128, Сирдарёда 192, Самарқандда 130, Андижонда 241 ва Тошкент вилоятида 940 нафар бемор қолди.
Изоҳ (0)