Фарғона вилоятига Жанубий Кореядан коронавирус инфекциясини аниқловчи 4 минг дона экспресс-тест олиб келинган. Мазкур тест тезкор ва аниқ бўлиб, натижаси 5-10 дақиқада маълум бўлади, дея хабар берган вилоят ҳокимлигининг ахборот хизмати.
Ўзбекистонда коронавирусни аниқлаш мақсадида ПЗР-диагностика, яъни полимераз занжир реакцияси усулидан фойдаланилмоқда. Бу текширув натижасининг маълум бўлиши учун энг қисқа 6-8 соат кетади. Баъзан 5-6 кун ҳам тест натижасини кутиш ҳолатлари учраб турибди, дейилади хабарда.
Шунингдек, ахборот хизмати Фарғона вилояти ҳокими Шуҳрат Ғаниев Жанубий Кореяга қилган хизмат сафари чоғида мутахассислар билан мулоқотда коронавирусни аниқловчи экспресс-тестларни вилоятга олиб келиш борасида келишувга эришгани ва тест тўпламларининг дастлабки партияси олиб келинганини қайд этган.
Хабарга кўра, экспресс-тест нафақат коронавирусни юқтирганлигини аниқлайди, балки илгари бемор бу касалликка дучор бўлган ёки бўлмаганини ҳам кўрсатади. Вилоятда мазкур экспресс-тестлардан чегара-назорат ўтказиш масканлари, йирик ташкилот ва корхоналарда фойдаланиш бошланган.
Эслатиб ўтамиз, Фарғона вилояти ҳокими Шуҳрат Ғаниев 6—8 июль кунлари Жанубий Кореяга хизмат сафарини амалга оширган. Музокаралардан кейин Фарғона вилояти ҳокимлиги ва Жанубий Кореянинг йирик компаниялари ўртасида 285 миллион АҚШ долларилик 7 та келишув имзоланган. Корея ҳудудий иссиқлик таъминоти корпорацияси (KDHS) директорининг ўринбосари Бенжамин Юн олти ой муддатга Фарғона вилояти ҳокими Шуҳрат Ғаниевнинг иқтисод ва инвестиция масалалари бўйича маслаҳатчиси сифатида жалб қилинганди.
Изоҳ (0)