Беларусь президентлигига номзодини қўйган Светлана Тихановская мамлакатдан болаларини олиб чиқиб кетди. Ушбу маълумотни номзоднинг ўзи «Тut.by» нашрига тасдиқлаган.
«Хартия97» нашри бош муҳаррири Наталья Радина Тихановскаянинг ўн ёшли ўғли ва тўрт ёшли қизи борлиги, улар бувиси билан Евроиттифоқ давлатларининг бирида эканини айтган.
Светлана Тихановская Беларусдаги президентлик сайловларида Марказий сайлов комиссияси турмуш ўртоғи, таниқли блогер Сергей Тихановскийни рўйхатга олишни рад этганидан кейин иштирок этишга қарор қилган.
Светлана Тихановскаяни, асосан, амалдаги президент Александр Лукашенконинг рақиблари — Виктор Бабарико ҳамда Валерий Сепкало тарафдорлари қўллаб-қувватламоқда, улар ҳам МСК томонидан рўйхатга олинмаган номзодлар.
Июнь ойида Тихановская агар сайловолди кампаниясида иштирок этишдан бош тортмаса, ўзи ва фарзандларига ёмон бўлиши ҳақида таҳдидлар бўлганини маълум қилганди.
14 июлда Беларусда президентлик сайловлари олдидан амалга оширилаётган кампания вақтида 700 нафардан зиёд одам ҳибсга олингани, уларнинг ҳар бештадан биттаси маъмурий қамоққа тушгани хабар қилинган.
16 июлда Беларусь Марказий сайлов комиссияси мамлакат президентлигига номзодларнинг даромадлари тўғрисидаги декларацияларни эълон қилган, амалдаги давлат раҳбари Александр Лукашенконинг кўчмас мулки ва автомобиллари мавжуд эмаслиги маълум бўлганди.
Изоҳ (0)