АҚШ давлат департаменти Чеченистон етакчиси Рамзан Қодировни санкциялар рўйхатига киритди. Бу ҳақда идоранинг расмий сайтида хабар берилган.
Хабарда айтилишича, Қодиров ҳудудга раҳбар сифатида инсон ҳуқуқларига оид кўплаб халқаро меъёрларнинг бузилишига шахсан жавобгар, хусусан, ноқонуний қамоққа олиш, одамларни қийнаш, ҳибсда ушлаб туриш каби ҳаракатларнинг амалга оширилишида бевосита иштирок этган.
Шунингдек, давлат департаменти Қодировнинг коронавирус пандемиясидан Чеченистонда озодликни чеклаш бўйича янги ноқонуний ўзгаришлар қилишда фойдаланганини қайд этган.
Қодировнинг ўзи мазкур янги санкцияларга жавобан Telegram’даги каналига қурол-яроғлар сақланадиган хонада автомат ушлаб тушган суратини жойлаштирган ва унинг остига «Помпео биз жангга розимиз. Буёғи янада қизиқ бўлади», – дея изоҳ қолдирган.
Қодиров 2017 йилдан буён АҚШ Молия вазирлигининг санкциялар рўйхатида қолмоқда, у «Магницкий қонуни» доирасида тақиқларга учраган.
Аввал Рамзан Қодиров ижтимоий тармоқларда «Грозний» телеканалининг саҳифаларини кузатмаган давлат хизматчисини жамият учун хавфли одам деб ҳисоблашини айтганди.
Ундан олдин июнь ўрталарида Чеченистон раҳбари Рамзан Қодиров Россия президенти Владимир Путинни ҳақорат қилган грузиялик журналист Георгий Габунияни ўлдиришни буюртма қилгани тўғрисидаги айбловга изоҳ берганди.
Изоҳ (0)