Саутгемптондаги Synairgen компанияси томонидан ишлаб чиқилган коронавирусдан даволаш услуби COVID-19’нинг оғир шакли тезлашишини 79 фоизга камайтириши мумкин. Бу ҳақда BBC News хабар қилган.
Компания Буюк Британиянинг тўққизта касалхонасида касаллик ташхиси билан даволанган 101 нафар кўнгиллида олиб борилган тадқиқотлар натижаларига таянган. Synairgen беморларга организмда вирус инфекцияси пайдо бўлишига қарши жавоб қайтарадиган бета-интерферон билан даволанишни таклиф этган. Улар небулайзер воситасида нафас олган ва аппарат ўпкага ҳаво киритиб организм иммун тизимида реакция ҳосил қилишга шароит яратган. Иштирокчиларнинг ярмига плацебо ёлғон дори берилган.
Synairgen вакилларининг айтишича, интерфероннинг қўлланилиши касалхоналардаги беморларнинг аҳволи ёмонлашишига тўсқинлик қилади, тадқиқотда иштирок этганларнинг айримларида инфекция ҳаётга хавф солмаган вақтда ундан соғайиш кўрсаткичи ошган.
Компания яқин кунларда бошқа хориж мамлакатларидаги тадқиқот натижалари ҳақида маълум қилади. Бу борадаги тақризлар илмий рўзномаларда эълон қилинмаган ва BBC ушбу баёнотни расман тасдиқлаб бўлмаслигини ёзмоқда.
Саутгемптон университети профессори ва тадқиқот раҳбари Том Уилкинсон иштирокчилар сони кўп бўлмагани, бироқ ижобий самара яққол намоён бўлганини қайд этган. Агар натижалар кенг миқёсда ҳам шундай ижобий бўлса, ушбу услуб билан коронавирус пандемиясига қарши курашда ўзгаришлар рўй беради, дейди олим. Synairgen бош директори Ричард Марсден тадқиқот натижаларини «ўзига хос туб бурилиш» деб атаган.
Аввал Буюк Британия, АҚШ ва Канада махсус хизматлари Россияни COVID-19 вакцинасини ишлаб чиқаётган халқаро тадқиқот марказларининг тармоқларига яширинча кириб, бу борадаги ахборотларни ўғирлашга уринганликда айблагани, Россияда Соғлиқни сақлаш вазирлиги COVID-19’га қарши учинчи янги доридан фойдаланишга ҳам рухсат бергани ҳақида хабарлар берилган.
Изоҳ (0)