Тожикистон парламентининг навбатдаги қўшма мажлиси 6 август куни бўлиб ўтади. Мазкур мажлисда навбатдаги президентлик сайлови куни эълон қилинади. Бу ҳақда «Asia-Plus» хабар берди.
Нашрнинг ёзишича, Тожикистонда катта эҳтимол билан президентлик сайлови 2020 йилнинг 6 ноябрига белгиланади. Тожикистоннинг амалдаги президенти Эмомали Раҳмоннинг ваколат муддати 2020 йил 6 ноябрда тугайди.
Мамлакат қонунчилигига кўра, Тожикистонда президент сайлови куни республика парламенти иккала палатасининг қўшма мажлисида амалдаги президент ваколат муддати тугашидан камида икки ой олдин белгиланади.
Конституция бўйича Президент умумий, тенг ва тўғридан-тўғри сайлов ҳуқуқи билан яширин овоз бериш орқали 7 йил муддатга сайланади.
Камида 30 ёшга кирган, фақат Тожикистон фуқаролигига эга, олий маълумотли, давлат тилида сўзлашадиган ва камида сўнгги 10 йил давомида республикада яшаган шахс республика президентлигига номзод бўлиши мумкин.
Бир шахс номзод сифатида рўйхатга олиниши учун мазкур номзодга камида 5 фоиз сайловчиларнинг имзолари керак бўлади.
Битта шахс кетма-кет икки муддатдан ортиқ президент бўла олмайди. Ушбу чеклов Тожикистондаги тинчлик ва миллий бирлик асосчиси — миллат раҳбари Эмомали Раҳмонга тааллуқли эмас.
Изоҳ (0)