Тожикистонда «Ишқобод» чегара постига 2019 йил ноябрь ойида амалга оширилган ҳужум туфайли тўрт нафар аёл ва ҳарбийлар жазоланди. Жами 9 нафар одам 2 йилдан 27 йилгача бўлган муддатга озодликдан маҳрум қилинди. Бу ҳақда Тожикистон Олий суди вакили Шермуҳаммад Шоҳиёнга таяниб, Asia-Plus хабар қилган.
«Олий суднинг 20 апрелдаги қарорига кўра, тўрт нафар ҳарбий, тўрт нафар аёл ва бир нафар эркак ҳужумда айбдор деб топилди ҳамда 2 йилдан 27 йилгача муддатга озодликдан маҳрум қилинди», – деган Шоҳиён.
Олий суд вакили матбуот анжуманида ҳарбийларнинг нима учун жиноий жавобгарликка тортилганига аниқлик киритмаган. У иш махфий белгиси остида кўриб чиқилгани ва бу борада қўшимча тафсилотлар айта олмаслигини билдирган.
Эслатиб ўтамиз, 2019 йил 6 ноябрда маҳаллий вақт билан 03:23 да қуролланган жангарилар гуруҳи Султонобод чегара отрядининг «Ишқобод» 4-заставасига ҳужум уюштирган. Махсус операция вақтида гуруҳнинг 15 нафар аъзоси йўқ қилинган ва беш киши қўлга олинганди.
Жангарилар сўроқ қилинганидан кейин уларнинг Афғонистон ҳудудидан қочиб ўтган ИШИД террорчилари экани аниқланган. Ҳужум уюштирганларнинг барчаси Тожикистон фуқаролари бўлгани, қўлга олинган ва ҳалок бўлганлар орасида аёллар ҳам борлиги хабар қилинганди. Афғонистон ҳукумати вакиллари ИШИД террорчиларининг мамлакат ҳудудидан Тожикистонга ўтиб, 6 ноябрда чегара постига ҳужум уюштирганини инкор этган.
8 ноябрь куни Тожикистон бош прокуратураси чегара постига уюштирилган ҳужум юзасидан жиноят иши очган, Ўзбекистон чегарачилари эса террорчилик ҳужумидан сўнг Тожикистон билан чегарадош ҳудудларни қўриқлашни кучайтирган.
Дастлаб Тожикистон ҳукумати томондан ҳалок бўлганлар сони 2 нафар эди, кейинчалик уларнинг 6 нафар экани маълум бўлган. Чегарачилардан 26 ёшли Изатилло Абубакр, Диловор Толипов, Ҳофизжон Ҳусаинов, Наимжон Саидолимов, Ғанижон Давлат ва участка нозири Баҳром Шаҳзода вафот этган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)