Самарқанд вилояти ҳокими Эркинжон Турдимов вилоятда коронавирусга чалинган беморларга қандай ёрдам кўрсатилаётгани ва вилоятдаги вазият ҳақида маълумот берди. Бу ҳақда вилоят ҳокимлиги ахборот хизмати маълумотига таяниб, «Дарё» мухбири Фарҳод Норбўтаев хабар берди.
«Вилоятда коронавирус бўйича вазият ёмонлашувига жиддий тайёргарлик кўрилмоқда. Шифохоналарда захира ўринлар, икки ойлик дори-дармон, керакли тиббий ускуналар беморлар сони ошишига тайёрлаб қўйилган, — дейди вилоят ҳокими Эркинжон Турдимов. — Хусусан, COVID-19 билан касалланганлар учун 8 мингта, оғир беморлар учун 100 та жонлантириш ўрни тайёрланган. Тез ёрдам рақами (103) учун 24 та рақамли телефон аппарати ва операторлар ишга туширилган. Телефон орқали тиббий маслаҳат (1105) хизмати ҳам йўлга қўйилган. Вилоятдаги 34 та портатив рентген аппаратининг барчаси коронавирус билан ишлашга ўтказилган ва қўшимча яна иккита махсус аппарат сотиб олинган».
Вилоят ҳокимининг маълум қилишича, COVID-19’ни даволаш учун зарур бўладиган 65 та дорининг икки ойлик захираси тайёрланган. Коронавирусга чалинган барча беморларга дорилар вилоят бюджети ҳисобидан бепул етказиб берилади. Бундан ташқари, COVID-19 аниқланган ҳолларда беморни жойлаштиришнинг махсус тартиби жорий этилган.
«Коронавирусга шубҳа қилинган беморнинг уйига шифокор бормайди. Биринчи босқичда бемор тез ёрдам ходимлари томонидан махсус қабул пунктига олиб келинади. У ерда беморга аниқ ташхис қўйилади ва кейин шунга қараб бемор керакли жойга жойлаштирилади, — деди Эркинжон Турдимов. — Шифокорлар COVID-19 билан касалланган беморнинг уйига борса ва касаллик юқтириб олса, эртага вирусга қарши ким курашади? Шифокорлар бугун бизнинг олтин фондимиз. Уларни асрашимиз керак. Мен ўзим кўрдим. Шифокорларнинг 99 фоизи ўз ишини аъло даражада бажаряпти. Моддий томондан ёрдам бера олмасак ҳам, маънавий томондан қўллаб-қувватлашимиз керак».
Эркинжон Турдимовнинг таъкидлашича, вилоят соғлиқни сақлаш бошқармаси билан ҳамкорликда қишлоқ поликлиникаларида ишловчи шифокорларга ҳам махсус йўриқномалар берилган. Беморлар шифокорлар билан мулоқот қилиши учун поликлиника шифокорларига Uzmobile компанияси томонидан 800 та телефон берилган.
«Касаллик белгилари пайдо бўлганда, ўз-ўзини даволамасдан дарҳол шифокорга мурожаат қилиш керак. Профилактика керак, эҳтиёткорлик керак, лекин белгилар пайдо бўлганда, албатта, мутахассисга мурожаат қилинг, — деди Эркинжон Турдимов. — Сабаби бир неча кун олдин самарқандлик ёш йигит коронавирусга чалинган, лекин буни оддий шамоллаш деб ўйлаб, ўзи даволаниб юраверган. Беш-олти кун ўтиб, аҳволи оғирлашган, ҳарорати 40 даражага чиқиб, ҳушини йўқотган. Шундан сўнг унинг онаси шифокорларга мурожаат қилган. Бемор дарҳол жонлантириш бўлимига ётқизилган ва бугунги кунда соғайди. Ана шундай воқеаларнинг олдини олишимиз керак».
Изоҳ (0)