Россиянинг Амур вилоятидаги газни қайта ишлаш заводида 13 июль, душанба куни юз берган норозиликнинг фаол иштирокчилари қўлга олинди, икки кишига қамоққа олиш эҳтиёт чораси қўлланилган. Бу ҳақда «Интерфакс» хабар берди.
Вилоят тергов бошқармасининг маълум қилишича, тартибсизликнинг 11 нафар энг фаол иштирокчиси қўлга олинган, 2 кишига нисбатан терговчининг сўровига биноан қамоққа олиш эҳтиёт чораси қўлланилган.
Айни пайтда қўлга олинган бошқа шахсларга нисбатан қамоққа олиш эҳтиёт чорасини қўллаш масаласи ҳал қилинмоқда. Терговчилар томонидан компаниянинг зарар кўрган бинолар ва савдо нуқталари кўриб чиқилган, бухгалтерия ҳужжатлари ўрганилган.
Тергов ҳужжатларига кўра, тартибсизликка ишчи патентлари учун тўловни амалга ошириш бўйича юзага келган низо сабаб бўлган.
«Интерфакс» хабарида қўлга олинганларнинг шахси ва фуқаролигига аниқлик киритилмаган.
Эслатиб ўтамиз, 13 июль куни Амур вилоятидаги Renaissance Heavy Industries компаниясига тегишли вақтинчалик вахта шаҳарчасида Ўзбекистон фуқаролари иштирокида исён юз берган. Ишчиларнинг сўзларига кўра, улар уч ойдан буён иш ҳақини олмаётгани сабабли мазкур ишга қўл урган.
Амур вилояти гурбернатори Василий Орлов Renaissance Heavy Industries пудратчи компанияси вакиллари ҳамда Амур газни қайта ишлаш заводи қурувчилари ўртасидаги тўқнашувдан кейин ишчиларга турли шаклдаги ёрдамлар таклиф қилинганини билдирди.
Ўзбекистоннинг Россиядаги элчихонаси Амурдаги ўзбекистонлик ишчилар исёни назоратга олинганини, воқеа жойига бош консул етиб борганини хабар берди. Кейинроқ Ўзбекистон Ташқи ишлар вазирлиги мазкур можаро ҳал этилгани ва ўзбекистонлик қурувчилар ўз иш жойига қайтганини маълум қилди.
Изоҳ (0)