ФИФА Наманганнинг «Навбаҳор» футбол клубига россиялик мутахассис Алексей Беленковга 520 минг АҚШ доллари миқдорида компенсация тўлаш мажбуриятини юклади.
Беленков 2018 йил октябрида «Навбаҳор»да Андрей Канчельскиснинг ёрдамчиси сифатида иш бошлаганди. Ўша йилнинг ёзида Канчельскис ва Беленков билан шартнома бекор қилинган. Бироқ 2019 йил августида россиялик мутахассислар яна «Навбаҳор»га қайтганди. Кейинчалик Беленковнинг ишдан олингани ёки у билан шартнома бекор қилингани ҳақида клуб томонидан бирорта расмий маълумот берилмаган.
«Championat.asia»нинг хабар қилишича, «Навбаҳор» раҳбарияти 2023 йилнинг декабрига қадар мўлжалланган шартнома бекор қилингандан кейин келишувда кўрсатилган пулларни тўламаган. Мураббийнинг юристлари «Навбаҳор»га 150 минг доллар тўлашни ва барча масала ёпилишини маълум қилган. Бироқ клуб бунга эътибор қилмаган.
Эндиликда «Навбаҳор» 30 кун ичида россиялик мутахассисга 520 минг доллар (5 миллиард 300 миллион сўм) тўлаб беришига тўғри келади. Акс ҳолда ФИФА клубга нисбатан санкция қўллайди.
Агар наманганликлар клуби шартларни бажармайдиган бўлса, клубдан очко тортиб олиниши, трансферларга тақиқ қўйилиши мумкин, жамоа ҳатто қуйи лигага тушириб юборилиши мумкин.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)