Вазн ташлаш учун спорт билан шуғулланишнинг ўзи кифоя қилмайди, сиз истеъмол қиладиган маҳсулотлар ҳам ташқи кўринишингиз ва саломатлигингизга таъсир кўрсатишини унутманг.
Шакар
Шакарни буткул зарарли маҳсулот деб бўлмайди. Чунки организмнинг маълум миқдорда унга нисбатан эҳтиёжи бўлади. Лекин сиз вазн ташлашни истасангиз, ундан воз кечиш тавсия қилинади. Чунки ушбу маҳсулот организмда, қорин ва белда ёғ тўпланишига олиб келадиган глюкоза тўпланишига сабабчи бўлади. Конфет, газланган сув ва ширинликларни рационингиздан чиқариб ташланг.
Хамирли таомлар
Оқ ун ҳам организмга глюкоза сингари таъсир кўрсатади. Нон, булочка, пончик ва печеньелар вазн ташламоқчи бўлганларнинг энг асосий душмани ҳисобланади. Чунки ушбу маҳсулотлар транс-ёғдан иборат бўлиб, организмда метаболизм ёмонлашишига олиб келади. Бир ҳафта давомида бундай маҳсулотларни истеъмол қилмасдан, организмдаги ижобий ўзгаришлардан ажабланишингиз аниқ.
Қайта ишланган гўшт маҳсулотлар
Колбаса, сосиска каби маҳсулотлар консервантлар, тўйинтирилган ёғ ва нитратлар ҳамда тузнинг кони ҳисобланади. Бу эса ўз навбатида саломатликка, хусусан, жигарга зарар келтиради.
Пишлоқли маҳсулотлар
Гап асл, сифатли пишлоқ ҳақида эмас, пишлоқ маҳсулотлари ҳақида кетмоқда. Асл пишлоқ таркибида — сут ёғи, минерал моддалар, витаминлар бўлади. Пишлоқли маҳсулот эса суррогат ҳисобланиб, семиришга сабаб бўладиган палма ёғи ёки бошқа ўсимлик ёғидан ташкил топади.
Фастфуд
Фастфудлар таркибида юқорида емаслик тавсия қилинган маҳсулотларнинг бари — шакар, оқ ун, қайта ишланган гўшт, пишлоқ шунингдек транс-ёғ ва катта миқдорда туз бўлади. Сиз парҳез қилаётган бўлсангиз, аммо ҳафтада икки марта гамбургер истеъмол қилсангиз, ижобий натижадан умидингизни узсангиз ҳам бўлади.
Алкогол
Спирт организмда иштаҳа учун жавоб берадиган нейронларга таъсир кўрсатибгина қолмай, калория ортиши ва метаболизм секинлашишига сабабчи бўлади.
Изоҳ (0)