Бир ой ҳар куни эрталаб совуқ душ қабул қилинса, организмда қандай ўзгаришлар кузатилади?

Тонгда совуқ душ қабул қилиш организмни бироз зўриқтириши мумкин, лекин ушбу жараёнда энергияга тўла бўлишга сабаб бўлувчи адреналин ва мия фаолияти яхшиланишида аҳамиятли бўлган норэпинефрин ажралади. Қолаверса, совуқ душ бир финжон қаҳва сингари тетиклаштириш хусусиятига эга.

Мушаклар оғриши тўхтайди

Бежизга жароҳатланган тана қисмига музли халтача қўйилмайди, совуқлик шиш ва оғриқни кетказади, тўқималар тикланишига сабабчи бўлади. Британиянинг The New England Journal of Medicine ўтказган тадқиқотида аниқланишича, 60 фоиз спортчилар оғир машқлардан кейин совуқ душ қабул қилиб, мушаклари деярли оғримаётганини таъкидлаган. Бундай натижага эга бўлиш учун шунчаки совуқ душ тагида туриш эмас, қон оғриқ бор тана қисмига йиғилгунича сувни маълум муддат тутиб туриш керак. Бу вақтда тери рангида бироз қизариш кузатилади.

Қомат ихчамлашиши кузатилади

Организмда икки хил — оқ ва жигарранг ёғ бўлади. Оқ ёғ «ёмон», жигарранги бўлса «яхши» ёғ ҳисобланади. Совуқ сувли душ қабул қилиш эса айнан оқ ёғдан қутилишга ёрдам беради. Олимларнинг аниқлашича, 10-15 дақиқа совуқ душ қабул қилганда метаболизм, велосипед учгандагидек яхшиланади. Бу ҳар куни совуқ душ қабул қилинса, йилига 5 кг вазн йўқотиш мумкинлигини англатади.

Саломатлик учун фойда

Совуқ душ метаболизмни яхшилайди. Моддалар алмашинувининг яхшиланиши эса иммун тизимини фаоллаштиради, бунинг оқибатида вирусга қарши курашувчи оқ қон таначаларининг кўпайишига олиб келади.