Юз терисида муаммолар кузатилишини пайқаган бўлсангиз, дорихона ёки косметик восита харид қилишга шошишдан аввал овқатланиш рационингизга назар ташланг.
Сутли маҳсулотлар сиз ўйлаганчалик зарарсиз эмас
Шифокор-косметолог Наталья Раевскаянинг маълум қилишича, сутли маҳсулотлар таркибида лактоза углеводи, яъни сутли шакар бўлгани учун ҳам ҳуснбузар тошишига фаст-фуд ва газланган сувдан кам бўлмаган таъсир кўрсатади. Гап шундаки, лактоза углеводининг парчаланиши учун лактоза ферменти етарли даражада бўлиши керак, аксинча бўлса, сутли шакар ичакларда сўрилмай қолиб кетади ва бу ўз навбатида ташқи кўринишга ҳам таъсир кўрсатади. Фитнес-нутрициолог Анна Макарова эса қаттиқ пишлоқ, творог, кефир ва йогуртлар бундан мустасно эканини таъкидлайди. Чунки бу маҳсулотлар пробиотикларга бой экани сабаб ичаклар микрофлорасига ижобий таъсир кўрсатади.
Сут организмнинг ўсишида аҳамиятли ҳисобланади ва шу боисдан ҳам болажонларга тавсия қилинади. Сут организмда ўсиш омилини рағбатлантириб туради, унинг истеъмолидан кейин эса мияга организм ҳали етилмаган, ўсиши керак деган сигнал боради ва бунинг натижасида теридан ҳуснбузар тошишига сабаб бўладиган себул ажралиб чиқади. Шу ўринда ўринли савол пайдо бўлади: нима учун айримларга шоколад ҳам, сут ҳам таъсир қилмайди — ҳуснбузар ҳам тошмайди, бошқаларда эса аксинча? Жавоби эса генетик мойиллик билан боғлиқ бўлиб, қўзғатувчилар ёғли юз терисида кичик маҳсулот таъсирида ҳам муаммолар келтириб чиқаради.
Шакар эрта қаришга сабабчи бўладими?
Ширинлик истеъмолидан кейин организмда оқсил ва шакар ўртасидаги кимёвий реакция — гликация жараёни юз беради. Бу жараён эса тери таранглиги, силлиқлиги ва эгилувчанлигини таъминлайдиган коллаген толаларига салбий таъсир кўрсатади, янги толалар ўсишига қаршилик қилади, қон микроциркуляцияси ва ҳужайралар регинарациясининг ҳам ёмонлашишига олиб келади. Бунинг натижасида терининг эрта қариши, ажин тузиши кузатилади.
Рацион ва тери намлиги ўртасидаги боғлиқлик
Тери қуриши истеъмол маҳсулотлари билан боғлиқ. 25 ёшдан кейин юзни намлантиришга бўлган эҳтиёж юқори бўлади ва намлантиришни ички ва ташқи томондан бирга олиб бориш керак.
Мутахассис Наталья Раевская тери қуруқлигига қарши витамин ва ташқи намлантирувчи препаратлар ҳамда биоревитализация билан курашиш кераклигини билдиради.
Бироқ бу вақтда рационга ҳам эътибор бериш керак. Организмга тери саломатлиги учун муҳим бўлган оқсил, ёғ кислоталари, А ва E витаминлари етарли бўлишига диққат қаратиш керак. Қолаверса, етарли миқдорда суюқлик ичиш, қаҳва сийдик ҳайдаш хусусиятига эга бўлгани учун унинг истеъмолини назорат қилиш керак.
Сабзавот ва мевалар
Мутахассис Анна Макарованинг сўзларига кўра, ҳар бир инсоннинг оқсил, ёғ ва углеводлар истеъмолига эҳтиёжи юқори бўлади. Шу сабаб ҳам таркибида ушбу моддалар бўлган маҳсулотларни истеъмолидан ташқари, таркибида мева ва сабзавот экстрактлари қўшилган косметик воситалардан ҳам фойдаланиш тавсия қилинади. Айниқса, турли витамин ва тўйинган ёғлар, антиоксидант ва микроэлементлар қўшилмасидан тайёрланган воситалар айни муддао.
Изоҳ (0)