Хитойда коронавирусга чалинганлар сони яна ошмоқда. Жанубий Кореяда касалланганлар 13 711 нафарга етди
Хитойда сўнгги суткада коронавирус билан касалланиш бўйича 22 та ва касаллик белгисиз ўтаётган 14 та ҳолат аниқланди, беморларнинг 21 нафари соғайди, деб хабар бермоқда «РИА Новости» Хитой Соғлиқни сақлаш миллий комиссиясига таяниб.
Аниқланган янги касалланиш ҳолатининг 16 таси мамлакатнинг ўзида, қолган 6 таси четдан юқтирилган. Хитойда касалланиш ҳолати яна ортмоқда. 17 июлда 10 кишида, 16 июлда 1 кишида, 15 июлда эса 6 кишида коронавирус қайд этилганди.
Мамлакатда умумий ҳисобда 83 644 киши коронавирусга чалинган, уларнинг 78 758 нафари соғайган, 4634 нафар бемор COVID-19 қурбонига айланган. Касалхонада 251 киши даволанишда қолмоқда.
Шунингдек, Хитойда касаллик белгисиз ўтаётган 14 та ҳолат аниқланган. Шундай кишиларнинг яна 109 нафари кузатувда бўлиб турибди.
Жанубий Кореяда эса сутка давомида 39 киши коронавирусга чалингани қайд этилиб, касалланганларнинг умумий сони 13 711 нафарга етди. 17 июлда 60 киши, 16 июлда 61 киши, 15 июлда 39 киши коронавирусга чалингани қайд этилганди.
Аниқланган янги касалланиш ҳолатларининг 11 тасида вирус мамлакатнинг ўзида, қолган 28 та ҳолатда четдан юқтирилган. Мамлакат ҳукумати кунлик касалланишлар орасида четдан юқтириш ҳолатлари ошаётганидан хавотирда.
«Сўнгги 10 кунда вирусни четдан юқтириш ҳолатлари улуши мамлакатнинг ўзида юқтириш ҳолатига қараганда кўп бўлди, бу эса касалликнинг четдан кириб келиши ҳолатларининг олдини олишга эътиборни кучайтиришни тақозо этмоқда», — деган эди Жанубий Корея бош вазири Чон Се Гюн ҳукуматнинг коронавирус бўйича ўтказилган 15 июль кунги йиғилишида.
Жонс Ҳопкинс маълумотларига кўра, мамлакатда сутка давомида 59 киши соғайиб, тузалганларнинг умумий сони 12 460 нафарга етди. Вирус қурбонлари сони 293 нафарни ташкил қилмоқда.
