O‘zbekiston fuqarolarining Janubiy Koreyaga kirish tartibi qat’iylashtirilishi mumkin

Janubiy Koreya koronavirus tarqalishiga qarshi qat’iy karantin choralari qo‘llanadigan davlatlar ro‘yxatini kengaytirishni rejalashtirmoqda, deb xabar bermoqda “Interfaks”. Ushbu ro‘yxatga O‘zbekiston ham kiritilishi mumkin.

“Hukumat bugun virus import qilinishi xavfi yuqori bo‘lgan davlatlarni qo‘shimcha ravishda aniqlaydigan qarorni qabul qiladi”, — deb aytgan mamlakat bosh vaziri Chon Se Gyun hukumatning koronavirus bo‘yicha o‘tkazilgan navbatdagi yig‘ilishida.

“Ushbu davlatlarga nisbatan qat’iy karantin choralari, shu jumladan, viza cheklovlari, kirish reyslariga cheklovlar, shuningdek, koronavirusga testning manfiy natijasi haqida ma’lumotnoma taqdim etish majburiyati qo‘llaniladi”, — deya tushuntirish bergan vazir.

Qayd etilishicha, ro‘yxatga boshqa davlatlar qatori O‘zbekiston va Filippin ham kiritilishi mumkin. Ayni vaqtda ushbu ro‘yxatdan 4 davlat — Qozog‘iston, Qirg‘iziston, Bangladesh va Pokiston bor.

Shuningdek, bosh vazirning ta’kidlashicha, Janubiy Koreyani kesib o‘tuvchi xorijiy sayohatchilar ekipaji a’zolariga vizasiz kirish tizimi vaqtincha to‘xtatiladi.

Bu qaror oxirgi haftalarda Janubiy Koreyaga keluvchi xorijlik dengizchilarda koronavirus qayd etilish holatlari ko‘plab uchrayotgani ma’lum qilingandan keyin qabul qilingan.

“So‘nggi 10 kunda virusni chetdan yuqtirish holatlari ulushi mamlakatning o‘zida yuqtirish holatiga qaraganda ko‘p bo‘ldi, bu esa kasallikning chetdan kirib kelishi holatlarining oldini olishga e’tiborni kuchaytirishni taqozo etmoqda”, — degan bosh vazir.

Janubiy Koreya Kasalliklar profilaktikasi va nazorati markazi (KCDC)ning 15-iyulgi ma’lumotlariga ko‘ra, mamlakatda 39 kishining koronavirusga chalingani qayd etilgan. Shundan 11 nafari mamlakatning o‘zida, 28 nafari chetdan yuqtirgan. Janubiy Koreyada kasallik qayd etilganlarning umumiy soni 13 551 nafarga yetgan.