Исроилда коронавирус билан касалланиш ҳолатлари сонининг ошаётгани сабабли 17 июлдан бошлаб спорт заллари ёпилди ва ресторанлар иши чекланди. Бу ҳақда мамлакат ҳукумати фармойиши қабул қилинди, деб ёзмоқда Meduza.
Умумий овқатланиш шохобчалари овқатни фақат олиб кетиш учун тайёрлайди, спорт заллари эса фақат профессионал спортчилар учун очиқ бўлади.
Бундан ташқари, бинолар ичида 10 нафардан ортиқ, очиқ ҳавода эса 20 нафардан ортиқ одам иштирокидаги йиғилишлар тақиқланади.
Дам олиш кунларида қўшимча чекловлар жорий қилинади: ноозиқ-овқат дўконлари ва йирик савдо марказлари ёпилади, пляжларга бориш тақиқланади. Шунингдек, дам олиш кунлари гўзаллик салонлари ва сартарошхоналар, музейлар, кўргазма заллари, сув ҳавзалари ёпилади.
Чекловларнинг қайси кунгача жорий қилинаётганига аниқлик киритилмаган.
Исроилда коронавирус тарқалиши тезлашаётгани ҳақида июнь ойида хабар қилинган. Унга қадар мамлакат босқичма-босқич очилаётганди, расмийлар ва шифокорлар эпидемияни тез енгди деб ҳисобланаётганди.
Исроил ҳукумати 25 июнь куни хорижликларнинг мамлакатга киришига қўйилган тақиқни 1 августгача чўзишга қарор қилган.
Аввалроқ Исроил бош вазири мамлакатдаги эпидемиологик вазиятни «фавқулодда ҳолат» деб атаганди.
Изоҳ (0)