Ўзбекистон Президенти Шавкат Мирзиёев раислигида 17 июль, жума куни ҳудудларда ичимлик суви ва канализация тизимини яхшилаш, куз-қиш мавсумига тайёргарлик ишларини жадаллаштириш масалалари бўйича видеоселектор йиғилиши ўтказилди. Бу ҳақда Президент матбуот хизмати хабар берди.
Президент ичимлик суви таъминотида энергия тежамкор кичик лойиҳаларни амалга ошириш яхши самара беришини таъкидлади.
Андижон вилояти Улуғнор туманидаги тажриба лойиҳаси мисол сифатида кўрсатилди. Унга кўра, ичимлик суви қудуғига 5 киловаттли қуёш электр станцияси ўрнатиш орқали 2 минг нафар аҳоли сув билан таъминланади. 52 миллион сўмлик бу лойиҳа йилига 44 минг киловатт электр энергиясини тежаш эвазига уч йилга бормай ўзини ўзи қоплайди.
Марказлашган сув манбасидан узоқ, электр тортиб бориш катта харажат талаб қиладиган ҳудудларда шундай лойиҳаларни кўпайтириш кераклиги белгиланди.
Соҳада инвестицияларни ўзлаштиришда қолоқликка йўл қўймаслик учун халқаро молия ташкилотлари маблағлари ҳисобига амалга ошириладиган лойиҳалар бўйича харидлар очиқ ўтказиладиган ва уларнинг ижросини мувофиқлаштириб, самарали мониторинги юритиладиган янги тизим жорий қилиниши белгиланди.
Гидроиншоотларда сув ўлчагичлар, истеъмолчиларда ҳисоблагичлар ўрнатиш қамровини кенгайтириб, улардаги маълумотларни қайта ишловчи рақамлаштирилган марказ ташкил қилиш бўйича топшириқ берилди.
«Сув қувурларидаги йўқотишлар ҳам кўп. Баъзи жойларда ичимлик суви сифати стандартга жавоб бермаслиги аниқланган. Бу муаммоларни ҳал этишда Ичимлик сувидан фойдаланишни назорат қилиш инспекцияси фаолияти сезилмаяпти», — деди давлат раҳбари.
Шунинг учун соҳага хусусий секторни фаол жалб қилиш, унга субсидиялар ажратиш ва бошқа шароитлар орқали жозибадорликни ошириш мумкинлиги қайд этилди.
Изоҳ (0)