Bosh prokuratura axborot xizmati Farg‘ona viloyati Quva tumanidagi tez tibbiy yordam bo‘limida yuzaga kelgan janjalning tafsilotlari haqida “Daryo”ga ma’lum qildi.
Xabarda qayd etilishicha, voqea Quva tuman prokuraturasi tomonidan o‘rganilgan. 10-iyul soat 21:20 larda Quva tumani, “Go‘zal” mahallasida yashovchi U.J. tuman tez tibbiy yordam bo‘limiga qo‘ng‘iroq qilgan va nogiron o‘g‘lining sog‘lig‘ida o‘zgarishlar bo‘lganini aytgan.
Ammo U.J.ning murojaati bo‘lim xodimasi N.Z. navbatchi shifokorlar boshqa xonadonda tibbiy ko‘rikda ekanligi, ushbu xonadondan chiqqandan so‘ng zudlik bilan U.J.ning xonadoniga borishi mumkinligini bildirgan.
Shundan so‘ng U.J. bo‘limning telefon raqami band bo‘lganligi sababli avtomashina kelishini kutmasdan, karantin qoidalarini buzgan holda, 2 nafar tanishi bilan tibbiy niqobsiz S.Z. va Y.Z. bilan birga kelgan. U bu yerda qabulxona oynalarini sindirib, chaqiruvlarni qabul qilish xodimasi N.Z. bilan og‘zaki janjallashgan.
U.J. va uning tanishlari bo‘limga kelgan IIB xodimlarining talablariga bo‘ysunmasdan, mayda bezorilik harakatlarini davom ettirgan. Yakunda Quva tumani IIB tomonidan mazkur holatlar yuzasidan tegishli hujjatlar Quvasoy shahar ma’muriy sudiga yuborilgan.
Quvasoy shahar ma’muriy sudining 2020-yil 17-iyuldagi qaroriga ko‘ra, U.J.ga Ma’muriy javobgarlik to‘g‘risidagi kodeksning 54-moddasi 1-qismi, 61 (2)-moddasi 1-qismi 183,194-moddalari, Y.Z. va S.Z. 54-modda 1-qismi, 183,194-moddalarida ko‘rsatilgan huquqbuzarliklarni sodir etgan deb topilib, Y.Z. va S.Z.ga 10 sutka ma’muriy qamoq, U.J.ga nisbatan esa mazkur kodeksning 29-moddasi qo‘llanib, bazaviy hisoblash miqdorining 5 baravari miqdorida jarima jazosi tayinlangan.
Shuningdek, tezkor tibbiy yordam bo‘limi chaqiruvlarini qabul qilish xodimi N.Z.ga Ma’muriy javobgarlik to‘g‘risidagi kodeksning 41-moddasi, 54-moddasi 1-qismida ko‘rsatilgan huquqbuzarlikni sodir etgan deb topilib, bazaviy hisoblash miqdorining 5 baravari miqdorida jarima jazosi tayinlangan.
Avval Samarqand shahrida 3-iyul, juma kuni 26 yoshli fuqaro Samarqand viloyat ko‘p tarmoqli tibbiyot markazining qorovuli va shifokorini urgani uchun unga nisbatan jinoyat ishi ochilgani, Buxoroda poliklinika hamshirasi SEOM xodimi tomonidan kaltaklangani, 21 yoshli juvonning homilasi tushgan bo‘lishi mumkinligi haqida xabarlar berilgan.
Izoh (0)