Веналарнинг кенгайиши, тугунчалар ва илонсимон нақшлар пайдо бўлиши нафақат ташқи томондан хунук кўринади, балки бошқа жиддий муаммоларни келтириб чиқарувчи касаллик ҳисобланади. Варикозни даволагандан кўра, олдини олган яхши.
Жисмоний машғулот
Қадди-қоматингизда муаммо бўлмаса ҳам спорт билан шуғулланишни ёддан чиқарманг. Гап шундаки, жисмоний машқлар нафақат қадди-қомат, балки саломатлик, хусусан, оёқлар учун ҳам аҳамиятли. Айниқса, кўп ўтириб ишлайдиганлар учун енгил машқларни бажариш муҳим саналади. Бироқ оғир машқлар веналарга зарар етказиши мумкинлигини ҳам ёддан чиқармаслик керак. Машқлар енгил бўлиши, ортиқча зўриқиш кузатилмаслиги керак.
Ҳаракатдан тўхтаманг
Кўп қаватли уйда турадиганларга лифтни унутиб, зинапоялардан фойдаланиш тавсия қилинади. Зинапоялар югуриш йўлакчаси ўрнига энг яхши альтернатив ҳисобланади. Бу оёқларнинг тонусда бўлишига, калория эришига ёрдам беради. Аммо ҳар эҳтимолга қарши эҳтиёткор бўлинг, зинадан шошиб чиқманг. Узоқ вақт тик оёқда турмаслик ҳам тавсия қилинади.
Эҳтиёткорлик
Аёлларга оғир юк кўтармаслик, дўконга уй яқин, деб пиёда 5 литрли сув ёки сумка билан ҳаракатланиш тавсия қилинмайди. Агар соғлиғингиз керак бўлса, ўзингизни асрашни ўрганинг, 2 килодан оғир буюмларни кўтариш оқибати нафақат варикоз, балки чурра, умуртқанинг зўриқиши ва бошқа бир қанча жиддий касалликларни келтириб чиқариши мумкин. Шу сабаб ҳам машғулот залида ҳам тренер кузатуви остида машқ бажариш, спорт туридан сузиш, йога ва пилатес билан шуғулланиш тавсия қилинади.
Дам олиш
Иш куни тугаганидан кейин организм, хусусан, оёқларга бир оз дам беришни унутманг. Уйга келишингиз билан контраст душ қабул қилинг. Иссиқ ва совуқ сув кетма-кетлиги организмни соғломлаштириш хусусиятига эга. Бундай душ қабул қилиш инсонни тетиклаштиради, тинчлантиради, қон томир деворларини мустаҳкамлаб, уларнинг тонусини яхшилайди. Ушбу тинчлантирувчи муолажадан кейин оёқларингизни тепага кўтариб ётинг, шунда шиш ва чарчоқлар ариганининг гувоҳи бўласиз.
Пошна кийманг
Варикознинг олдини олиш учун пошнали оёқ кийимларни киймаслик керак. Кундалик учун айниқса. Танловингизни спорт услубидаги, ҳаракатланишга қулай ва енгил пойабзалларга қаратинг. Муҳим тадбирларгагина пошна туфли кийинг, ўқиш ёки ишга эмас. Ингичка, баланд пошнали туфлилар оёқларни зўриқтириб, турли касалликларни келтириб чиқариши мумкин.
Соғлом овқатланинг
Табиий маҳсулотлардан тайёрланган таом нафақат қадди-қоматнинг кўркам бўлиши, балки саломатлик учун ҳам муҳим экани аллақачон маълум. Шу сингари қон айланишига ҳам истеъмол маҳсулотининг таъсири юқори эканини ёддан чиқарманг. Ёғли, ширин, шўр таомлардан тийилинг. Бундан ташқари, варикознинг олдини олиш ҳамда семириб кетмаслик учун ҳам тановулга эътиборли бўлиш керак. Унутманг, ортиқча вазн оёқлар зўриқиши, қон томирлари кенгайишига сабаб бўлади.
Изоҳ (0)