Дўконда чиройли ёрлиқ ёпиштириб қўйилган ҳар қандай маҳсулотга учмаслик, саломатликни хавф остига қўймаслик ва маблағни қалбаки маҳсулотга сарфламаслик учун қуйидагиларга амал қилиш тавсия қилинади.
Пишлоқ
Пишлоқнинг сифатлиси арзон бўлиши мумкин эмас. Масалан, асл пармезан пишлоғи қаттиқ бўлади, дўкон пештахтасидаги пармезан деб ёзиб қўйилган, аммо юмшоқ бўлган пишлоққа палма ёғи қўшилган бўлади.
Қандай текшириш мумкин?
Таркибини кўздан кечиринг. Асл пишлоқ сут, таркибида ширдон суви бўлган фермент ва ачитқидан ташкил топган бўлади. Ёрлиқда узундан узун стабилизаторлар, қуритилган сут ва консервантлар ёзилган рўйхатга кўзингиз тушса, билингки бу қалбаки пишлоқ. Пишлоқнинг бир бўлагини олиб, унга ёд томизиб кўринг, агар кўкарса, демак, пишлоқ таркибида крахмал бўлади. Бу пишлоқ эмас, пишлоқли маҳсулот эканидан дарак беради. Бошқа йўли ҳам бор: пишлоқ бўлагини олиб оловга тутинг, сифатли пишлоқ эриб куйган сутнинг ҳиди чиқади. Қалбаки маҳсулот эса ёниб кетади.
Зайтун ёғи
Ўрта ер денгизи ошхонасини севувчилар, зайтун ёғининг тўқ шиша идиш ёки темир банкага солинганини олиш кераклигини яхши билади. Чунки айрим тадбиркорлар пул ишлаш учун ўсимлик, маккажўхори ёки соя мойига бўёқ ва «ароматизатор» қўшиб, зайтун мойи ёрлиғини ёпиштириб сотувга чиқариш ҳоллари ҳам кузатилиб туради.
Қандай текшириш мумкин?
Асл ва қалбаки мойни таъмидан фақатгина экспертлар аниқлай олади. Сиз эса бошқа йўлни синаб кўринг: шиша идишга солинган мойни музлаткичга қўйинг. Ҳақиқий маҳсулот қуюқлашиб, чўкмалар ҳосил бўлади.
Шоколад
Шоколаднинг қандай экани, таъми қандай бўлиши унинг таркибидаги какао ёғига боғлиқ бўлади. Асл какаода антиоксидантлар, полифенол ва алкалоидлар бўлиб, бундай какаодан ташкил топган шоколаднинг ифори ҳам бошқача бўлади, инсонга фойда беради ва кайфиятни кўтаради. Аммо, шоколаддаги какао ёғини бошқа ўсимлик ёғи билан алмаштириб ишлаб чиқарадиганлар ҳам йўқ эмас.
Қандай аниқлаш мумкин?
Таркибини ўқиб чиқинг ва қандай ёғ ишлатилганига диққатингизни қаратинг. Ҳақиқий шоколад силлиқ ялтироқ бўлиб, пластилинга ўхшамайди. Пальма ёғи қўшилган шоколад овозсиз бўлинади, ҳақиқийсини бўлганда эса, кисирлаган овоз эшитилади. Шоколад бўлагини бармоғингизга қўйиб кутинг, сифатли маҳсулот эриб қўлингизга ёпишади.
Сметана, творог ва сут
Ўсимлик ёғларига крахмал қўшиб ёрқин банкаларга солинган ҳар қандай маҳсулот ҳам сметана бўлавермаслигини унутманг. Баъзи ишлаб чиқарувчилар, бошқа маҳсулотларни устига сут ёки творог ёрлиғини ёпиштириб сотувга чиқаради. Лекин яхшилаб кўз ташланса, кўзга кўринмайдиган даражада кичкина қилиб сутли ичимлик ёки творог маҳсулоти деб ёзилганини кўриш мумкин.
Қандай текшириш мумкин?
Бир қошиқ сметанани қайноқ сувга солинг. Асл сметана тезда аралашиб кетади, таркибида соя оқсили бўлган сметана эса чўкма ҳосил қилади.
Турли қўшимча ва арзон ёғлар қўшилган творог қиздирилганда ёғ ажралиб чиқади. Сутни эса фақатгина татиб кўриб аниқлаш мумкин.
Қаҳва
Донли қаҳвани қалбакилаштириш осон бўлмагани учун фирибгар тадбиркорлар эрувчан қаҳва ишлаб чиқаришни афзал билади. Куйдирилган шакар, арпа ва соя дукагига ҳам қаҳва деб ёрлиқ ёпиштирилиб сотилиши мумкинлигини унутманг.
Қандай текширса бўлади?
Сифатли қаҳва арзон бўлмайди. Яхшиси эса, донли қаҳва сотиб олиб ундан мустақил равишда тайёрлаш.
Изоҳ (0)