Россия—Қозоғистон чегарасида қолиб кетаётган минглаб ўзбекистонликларни поезд орқали қайтариш бошланди

Россия—Қозоғистон чегарасида қолиб кетган минглаб ўзбекистонликлар поезд орқали қайтарилмоқда. Бу ҳақда «Ўзбекистон темир йўллари» матбуот хизмати хабар берди. Улар Россияда ишсиз қолгач, Қозоғистон орқали уйларига етиб олмоқчи бўлган, бироқ у ерда коронавирус туфайли чекловлар қатъийлаштирилиб, чегарада қолиб кетганди.

«Ўзбекистон темир йўллари» хабарида маълум қилинишича, 16 июль куни Ўзбекистон фуқароларини Россия—Қозоғистон давлат чегарасидан ўтказиш масаласи бўйича Россия томони билан келишувга биноан, Ўзбекистоннинг учта йўловчи поезди Тошкент томон йўл олди.

1404 йўловчиси бўлган иккита поезд Кинель, яна бир поезд эса 702 йўловчи билан Бузулук станцияларидан ҳаракатланмоқда. Йўл давомида йўловчи поездлар фақат техник кўрик учун тўхтатилади, яъни станция-вокзалларда йўловчилар платформага тушишига рухсат этилмайди.

Чипталар фақат Ўзбекистон фуқаролари учун сотилди. Бузулук—Тошкент йўналишидаги чипталар нархи 1 миллион 200 минг сўм (8500 рубль), Кинель—Тошкент — 1 миллион 450 минг сўм (10 100 рубль)ни ташкил этди.

Поездлар Ўзбекистон Миллий гвардияси, Ички ишлар вазирлиги ва Соғлиқни сақлаш вазирлиги ходимлари кузатуви остида олиб келинади. Ушбу рейсларнинг барча йўловчилари поездлардан тушишлари биланоқ Наманган ва Тошкент вилоятларининг карантин зоналарига юборилади.

Эслатиб ўтамиз, президент Шавкат Мирзиёев 8 июль кунги видеоселектор йиғилишида «Чет эллардан шу бугунгача 90 мингдан кўп фуқароларимизни қайтариб олиб келдик. Яна бир марта халқимизга мурожаат қилиб айтмоқчиманки, чет элда қолган ҳамма фуқароларимизни, албатта, олиб келамиз», деган эди.

Шундан сўнг, Ўзбекистон Ташқи ишлар вазирлиги Қозоғистон билан чегарадаги «Ғишткўприк» чегара пости яқинида тўпланиб турган 4 мингга яқин ўзбекистонлик чегарадан ўтказилгани ҳақида хабар берди.

Ўзбекистонликларнинг Россия—Қозоғистон чегарасига тўпланиши май ойида ҳам кузатилган, ўшанда Ўзбекистон ҳукумати Россия ва Қозоғистон ваколатли органлари билан келишган ҳолда, 1100 нафар фуқарони автобусда мамлакат ҳудудига олиб келганди. Ўшанда расмийлар мазкур амалиёт истисно тариқасида фақат бир мартагина амалга оширилаётганини таъкидланган эди.