InfinBank’нинг тўрт нафар ходимида коронавирус аниқланди

InfinBank Қашқадарё вилоят филиалининг тўрт нафар ходимида коронавирус аниқланди. Бу ҳақда компания матбуот хизмати хабар берди.

Маълум қилинишича, Ўзбекистонда эпидемиологик вазият кескинлашгани сабабли 10 июлдан 1 августгача карантин чоралари кучайтирилиши эълон қилинганидан буён InfinBank филиаллари, хусусан, Қашқадарё вилоят филиали ҳам 9 июлдан буён масофадан туриб ва онлайн тарзда мижозларга хизмат кўрсатиш режимига ўтказилган.

Профилактика доирасида банк филиалларида барча ходимлар коронавирусга тестдан ўтказилмоқда. Хусусан, Қашқадарё вилоят филиалининг барча ходимлари 13 июль куни тестдан ўтказилган бўлиб, тест натижалари 14 июль куни маълум бўлган. Мусбат натижа 9 июлдан буён масофадан туриб ишлашга ўтказилган 4 нафар ходимда қайд этилган ва улар ўша куниёқ уй шароитида тўлиқ изоляцияга олинган.

Бу ҳақда амалдаги эпидемиологик протокол талабларидан келиб чиқиб СЭОА муассасаси хабардор қилинган.

Қайд этилишича, коронавирусга чалинган ва уйда туриб даволанаётган тўрт нафар ходимнинг аҳволи ҳозир яхши, уларнинг саломатлиги тиббиёт ходимлари томонидан мониторинг ва назорат қилиб турилибди. Қашқадарё вилоят филиали ўрнатилган тартибда ўз фаолиятини давом эттирмоқда.

Шунингдек, бундан буён ҳам банк жамоаси ва мижозлари саломатлигини таъминлаш мақсадида банк ва унинг филиалларида профилактика тартибида ходимларнинг (улар банк бинолари ёки масофада туриб ишлаётганидан қатъий назар) тестдан ўтказиш тадбирлари давом эттирилиши таъкидланаган.

Эслатиб ўтамиз, 23 июнь куни Тошкентдаги «Асака банк» ва «Ипак йўли банк» туман филиали бир нафар ходимида, 21 июнь куни «Ипотека банк»нинг Чилонзор туман филиали ходимида, 8 июнь куни «Равнақ банк»нинг Шайхонтоҳур филиали ходимида коронавирус аниқланганди.

Маълумот учун, 16 июль соат 10:00 ҳолатига кўра Ўзбекистонда коронавирус инфекциясини юқтириб олиш билан боғлиқ жами 14787 та ҳолат тасдиқланган; ҳозиргача беморларнинг 8655 нафари соғайган, 72 нафар беморнинг вафоти эса расман тасдиқланган. Сергели ИИО ФМБ подполковниги Абдулазиз Тошев ва Давлат хизматлари агентлиги Навоий вилояти бошқармаси масъул ходими Адҳамжон Деҳқоновнинг ўлими юзасидан ССВ ҳали ахборот бергани йўқ.