Ўзбекистон Президент Шавкат Мирзиёев 15 июль, чоршанба куни Тошкент шаҳри ва Тошкент вилоятида пандемия билан боғлиқ вазият муҳокамасига бағишланган видеоселектор йиғилиши ўтказди.
Йиғилишда маълум қилинишича, Тошкент шаҳрида касалликни аниқлайдиган тестлар ва зарур тиббиёт воситалари етишмаяпти. Дорихоналарда вирус ва иситмага қарши препаратлар нархи асоссиз, бир неча баробар ошириб юборилган.
Бундан ташқари, Тошкент шаҳрида 100 га яқин тез ёрдам машинаси етишмайди. Оқибатда охирги уч кунда Тошкент шаҳрида турли касалликлар бўйича шошилинч тиббий ёрдамга мурожаат қилган 43 нафар бемор тиббий ёрдам етиб боргунга қадар оламдан ўтган.
Қайд этилишича, бу ҳолатга шаҳар ҳокимлиги, Соғлиқни сақлаш вазирлиги, прокуратура мутлақо эътибор бермаган.
Айни пайтда Тошкент шаҳри шифохоналарида 418 та, Тошкент вилоятида эса 816 та штат бирликлари бўш тургани вазирлик ва ҳокимият томонидан жорий вазият ўз ҳолига ташлаб қўйилганидан далолат беради.
Маълум қилинишича, Юқори Чирчиқдаги карантин зонасида ва Зангиотадаги даволаш муассасасида кўплаб камчиликлар мавжуд.
Эслатиб ўтамиз, мазкур йиғилишда коронавирусга қарши курашни самарали ташкил қилмагани учун соғлиқни сақлаш вазири Алишер Шодмонов ва Тошкент шаҳар ҳокими Жаҳонгир Ортиқхўжаевга ҳайфсан эълон қилинди. Шунингдек, Президент Тошкент шаҳридаги вазиятни шармандалик деб атади ҳамда икки ҳудуд раҳбарларини танқид қилди.
Аввалроқ Ўзбекистон коронавирусга чалинган беморлар учун 15 та янги реанимобиль харид қилганди
Маълумот учун, 2017—2018 йиллар мобайнида Ўзбекистон тарихида биринчи марта тез тиббий ёрдам хизмати учун 1500 та янги ихтисослашган автомашина харид қилинган. 2020 йил январь ойида Тошкентдаги тез тиббий ёрдам хизмати учун хориждан келтирилган 150 та Ford замонавий реанимобили фойдаланишга топширилган. Вилоятларда ҳам шундай тизимни жорий қилиш режалаштирилган.
Бундан ташқари, Ўзбекистонда Isuzu D-Max пикаплари негизида тез тиббий ёрдам машиналарини ишлаб чиқариш режалаштирилмоқда.
Изоҳ (0)