Президент Шавкат Мирзиёев 15 июль, чоршанба куни Тошкент шаҳри ва Тошкент вилоятида пандемия билан боғлиқ вазият муҳокамасига бағишланган видеоселектор йиғилиши ўтказгани ва унда коронавирусга қарши курашни самарали ташкил қилмагани учун соғлиқни сақлаш вазири Алишер Шодмонов ва Тошкент шаҳар ҳокими Жаҳонгир Ортиқхўжаевга ҳайфсан бергани ҳақида хабар қилинганди.
Шавкат Мирзиёевнинг сўзларига кўра, коронавирус бўйича республикадаги энг оғир вазият Тошкент шаҳри ва Тошкент вилоятида кузатилмоқда. Президентнинг қайд этишича, бутун дунёда коронавирусга қарши кураш кетаётган вақтда Тошкент шаҳри ва Тошкент вилоятида «жилов бўш қўйилгани» сабабли бугунги вазият талабга жавоб бермайди. «Одамларнинг норозилиги юзага келгани ҳам ҳақиқат», — деди давлат раҳбари.
«Бу ерда ўтирган раҳбарлар, сизлар сиёсатни тушунасизларми, йўқми? Дунёда қандай иқтисодиёт бўляпти, вабо билан қандай курашиляпти, нимани таҳлил қиляпсизлар, деган савол мени қийнайди», — дея савол қўйди Президент.
Давлат раҳбари коронавирус билан боғлиқ мураккаб вазиятдан чиқиб кетиш бўйича Андижон, Наманган, Фарғона ва Самарқанд вилоятларини мисол қилиб кўрсатди ҳамда оғир шароитдан мазкур ҳудудлардаги биринчи раҳбарлар фидойилиги, қаттиққўллиги учун чиқиб кетилганини таъкидлади.
«Тошкентда нима бўлди? Тошкент вилояти нима бўлди? Ҳокимлар ва сектор раҳбарлари ўз ҳудудидаги ҳақиқий аҳволни умуман ўрганмаган ва ‘пастга тушмаган’. Сизлар ҳозирги сиёсатимизга, халқимизга хиёнат қиляпсизлар. Қандай аччиқ бўлса ҳам, баҳо мана шундай.
Уруш пайтидаги вазият ҳозир. Урушда фақат халқнинг тинчлиги, халқнинг осойишталиги, халқнинг соғлиғини ўйлашимиз керак. Энг асосийси, биринчи раҳбарлар тушунишни хоҳламаяпти. Улар ўзларининг ҳудудларидаги тиббиёт муассасаларига бирон марта кирмасдан, улар билан учрашмасдан, реал вазиятни ўрганмаган ва кўрмаган, десак адолатдан бўлади», — деди Президенти.
Шавкат Мирзиёев Тошкент шаҳри ва вилоятида аҳолини вирусдан огоҳлантириш ва сақлаш, касалликни ўз вақтида ва тўғри даволаш учун масъулият умуман ҳис қилнмаганини танқид қилди.
Соғлиқни сақлаш вазирлиги томонидан ҳам кейинги бир ойда коронавирусни даволаш стратегияси ва тактикаси кескин бузилгани, реал ҳолатдан келиб чиқиб, даволаш амалиёти ўзгартирилмагани танқид остига олинди.
«Шифокорлар томонидан беморларга нисбатан бефарқлик ва совуққонлик ҳолатларига ҳам йўл қўйилмоқда», — деди давлат раҳбари.
Шавкат Мирзиёев Ўзбекистон бўйича жами касалларнинг 40 фоизи Тошкент шаҳрига тўғри келаётганини қайд этиб ўтди.
«Агар бу ерда садоқатли одамлар ўтирганида, сиёсатга хайрихоҳ одамлар ўтирганида, Тошкентда шундай шармандалик мумкинмиди? Тошкентда иложи бор-ку ҳамма нарсанинг» — деди Президент.
Шунингдек, йиғилишда бу икки ҳудудда коронавирус тарқалишига қарши кураш ва аҳолини даволаш ишларига алоқадор барча вазирлик ва идоралар, йирик тиббиёт муассасалари раҳбарларидан иборат 24 соат ишлайдиган штаблар ташкил қилиш кўрсатмаси берилди.
Тошкент шаҳри ва вилоятидаги поликлиникалар ҳузуридаги мобил гуруҳлар сонини уч баробар кўпайтириш вазифаси юклатилди. Зангиота туманида яқинда иш бошлаган шифохонадаги жой сонини яна 1000 ўринга кўпайтириш топшириғи берилди.
Эслатиб ўтамиз, Шавкат Мирзиёев 14 июль куни ўтказилган видеоселекторда коронавирусга қарши кураш учун мамлакатда барча захира ва имкониятлар мавжудлигини таъкидлади, бироқ ҳозирда эпидемиологик вазият жуда оғирлигини айтди. Шунингдек, давлат раҳбари коронавирусни аниқлаш учун тест топшириш жараёнини соддалаштириш, ҳудудларда уч ойлик дори захирасини яратиш ҳамда дорихоналарда ва бозорларда нархлар ошишининг олдини олиш бўйича топшириқ берди. Шунингдек, зарур жойларда карантин чораларини кучайтириш бўйича топшириқ берилди.
Изоҳ (0)