Жанубий Корея коронавирус тарқалишига қарши қатъий карантин чоралари қўлланадиган давлатлар рўйхатини кенгайтиришни режалаштирмоқда, деб хабар бермоқда «Интерфакс». Ушбу рўйхатга Ўзбекистон ҳам киритилиши мумкин.
«Ҳукумат бугун вирус импорт қилиниши хавфи юқори бўлган давлатларни қўшимча равишда аниқлайдиган қарорни қабул қилади», — деб айтган мамлакат бош вазири Чон Се Гюн ҳукуматнинг коронавирус бўйича ўтказилган навбатдаги йиғилишида.
«Ушбу давлатларга нисбатан қатъий карантин чоралари, шу жумладан, виза чекловлари, кириш рейсларига чекловлар, шунингдек, коронавирусга тестнинг манфий натижаси ҳақида маълумотнома тақдим этиш мажбурияти қўлланилади», — дея тушунтириш берган вазир.
Қайд этилишича, рўйхатга бошқа давлатлар қатори Ўзбекистон ва Филиппин ҳам киритилиши мумкин. Айни вақтда ушбу рўйхатдан 4 давлат — Қозоғистон, Қирғизистон, Бангладеш ва Покистон бор.
Шунингдек, бош вазирнинг таъкидлашича, Жанубий Кореяни кесиб ўтувчи хорижий саёҳатчилар экипажи аъзоларига визасиз кириш тизими вақтинча тўхтатилади.
Бу қарор охирги ҳафталарда Жанубий Кореяга келувчи хорижлик денгизчиларда коронавирус қайд этилиш ҳолатлари кўплаб учраётгани маълум қилингандан кейин қабул қилинган.
«Сўнгги 10 кунда вирусни четдан юқтириш ҳолатлари улуши мамлакатнинг ўзида юқтириш ҳолатига қараганда кўп бўлди, бу эса касалликнинг четдан кириб келиши ҳолатларининг олдини олишга эътиборни кучайтиришни тақозо этмоқда», — деган бош вазир.
Жанубий Корея Касалликлар профилактикаси ва назорати маркази (KCDC)нинг 15 июлги маълумотларига кўра, мамлакатда 39 кишининг коронавирусга чалингани қайд этилган. Шундан 11 нафари мамлакатнинг ўзида, 28 нафари четдан юқтирган. Жанубий Кореяда касаллик қайд этилганларнинг умумий сони 13 551 нафарга етган.
Изоҳ (0)