«Дарё бўйи Бизнес сити» лойиҳаси ҳудудни қай тарзда ўзгартиради? Лойиҳа муаллифлари билан суҳбат (видео)

Чирчиқ дарёси бўйида «Дарё бўйи Бизнес сити» лойиҳаси амалга оширилиши режалаштирилгани ҳақида хабар берилган эди. 13 июль куни Тошкент шаҳар ҳокимлиги лойиҳа муаллифлари билан интервью видеосини эълон қилди.

Қайд этилишича, Чирчиқ дарёсининг сув сатҳи йилдан йилга камайиб кетмоқда. Дарё эса аҳоли ва саноат корхоналари томонидан ифлослантирилмоқда.

Бизнес сити дирекцияси инвесторлар билан ишлаш менежери Ирода Ўринованинг таъкидлашича, дарё ён-атрофи карер қилиб олинган. Ҳудуддан табиий тупроқ ва шағал олиб чиқиб кетилиши оқибатида экологияга нисбатан катта зиён етказилади.

Юқоридаги ҳолатларни олдини олиш мақсадида ҳудудда Тошкент шаҳар ҳокимлиги, Сув хўжалиги вазирлиги, Иқтисодий ривожланиш ва камбағалликни қисқартириш вазирлиги ва Молия вазирлиги ҳамкорлигида «Дарё бўйи Бизнес сити» лойиҳасини амалга ошириш кўзда тутилган.

Таъкидланишича, лойиҳа доирасида дарё ўзанини торайтириш ва бўшаган ерларни ободонлаштириб завод, фабрика ва истироҳат боғлари қуриш режалаштирилган. Ирода Ўринованинг сўзларига кўра бу янги иш ўринларини яратишга имкон беради.

Шунингдек, дарё бўйлаб туманларни боғловчи кўприклар ҳам барпо этилиши режалаштирилган.

Таъкидланишича, дарё бўйини худди шаҳар марказидек ободонлаштирилса, инвесторларнинг ҳудудга бўлган қизиқиши ортади. Шу билан туманнинг иқтисодий салоҳиятини ҳам кўтариш имкони туғилади.

Ҳисоб-китобларга кўра, лойиҳа доирасида 400 гектар ер бўшайди. Бўшаган ерлар инвесторлар учун тайёрланади.

«Дарё бўйи Бизнес сити» лойиҳаси Тошкентнинг Оҳангарон йўлидан Янги ҳаёт туманигача, умумий 16 километр масофани эгаллаши кутилмоқда. Лойиҳачилар унинг дизайнидан тўлиқ якунигача 5 йил талаб қилинишини айтмоқда. 2023 йилгача дарё бўйини торайтириш ва ободонлаштиришни якунлаш режалаштирилган.

«Дарё бўйи Бизнес сити» лойиҳасининг директори ўринбосари Умар Оҳуновнинг сўзларига кўра, Чирчиқ дарёсининг оқими торайиши билан бирга, унинг атрофида замонавий инфраструктура қад кўтаради. Шу жумладан, турар жой бинолари, савдо комплекслари, кўнгилочар марказлар, мактаблар, болалар боғчалари қурилади. Булар туристлар учун ҳам, Бектемир ва Сергели туманларини жозибадорлигини оширади.

Бу борада жаҳон, хусусан, Туркия тажрибаси ўрганилмоқда. Туркия компанияларининг мутахассислари бу масала устида иш олиб бориб лойиҳа муаллифларига консалтинг хизматларини кўрсатади. Мазкур дарё бўйи ҳудудлари хусусий юридик ва жисмоний шахслар тасарруфига берилмагани сабабли фуқаролар мулки бузилишига оид кескин масалалар кўтарилмайди.