Жиззах вилояти Ғаллаорол тумани марказидаги бозорда Давлат санитария-эпидемиология осойишталик маркази ходимлари тасвирга олиш жараёнлари тугаганидан сўнг хизмат жойидан кетиб қолгани аниқланди. Бу ҳақда «Ўзбекистон24» телеканалининг янгиликлар дастурида лавҳа намойиш этилди.
Лавҳада айтилишича, туман марказида жойлашган дўконларнинг баъзиларида карантин қоидаларига риоя қилинаётган бўлса, баъзиларида эса эътибор ҳам берилмаган. Огоҳлантиришларга қарамасдан санитария қоидаларга амал қилмаётган ва фаолияти тақиқланган бўлса-да, ишлашда давом этаётган бир қанча тадбиркорларга нисбатан Давлат санитария-эпидемиология осойишталик маркази ходимлари маъмурий баённомалар расмийлаштирган.
«Бозорга кираверишда дастлаб санитария-эпидемиология ходимларининг ишлаётганини кўрдик. Аммо 15-20 дақиқадан сўнг қайтиб келганимизда бу ердаги масъулларни топа олмадик. Фуқаролар бозор ҳудудига кириб-чиқишда эркин ҳаракат қилмоқда. Бозорда фаолият юритаётган тадбиркор ва харидорларнинг айримлари тартибга умуман амал қилмаяпти. Умуман, бозор ҳудудида аксарият тадбиркорлар мавжуд тартиб-қоидаларга амал қилган ҳолда ишламоқда. Расталар олди полиэтилен тўсиқлар билан ўралган, аммо сотувчиларда қўлқоп йўқ», – дейди журналист.
Мухбирнинг қўшимча қилишича, ниқобсиз юрган, эскирган ниқобдан фойдаланаётган, ниқобдан нотўғри фойдаланаётган фуқароларга туман ички ишлар ходимлари томонидан тушунтиришлар олиб борилган.
Изоҳ (0)