Халқаро футбол ассоциациялари кенгаши (IFAB) бир ўйинда бешта ўзгариш амалга ошириш қоидасини келаси мавсумда ҳам ўз кучида қолдирди.
Аввалроқ IFAB ва FIFA 2020 йилда якунланадиган мусобақаларда бир ўйин давомида беш нафаргача футболчи алмаштиришга рухсат берганди.
Коронавирус пандемияси сабаб тўхтаб қолган мусобақалар рестартидан сўнг ўйинчиларнинг жароҳат олиш эҳтимолини пасайтириш учун мазкур қарор қабул қилинганди.
Футболчиларнинг ҳозирги ҳолати ва 2020/21 йилги мавсум тақвимининг зичлиги сабаб мазкур қоида муддати узайтирилган.
Жамоалар келаси мавсум ҳам ўйин давомида учта имкониятда беш нафар футболчини майдонга тушириш ҳуқуқига эга бўлади. Шу билан бирга мазкур қоидаларни жорий қилиш ёки ундан воз кечиш миллий чемпионатлар ихтиёрида қолади.
Бундан ташқари, 2021 йилнинг августига қадар терма жамоалар ўртасидаги мусобақаларда ҳам бешта ўйинчи алмаштириш қоидаси амалда бўлади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)